熱門:

2020年10月21日 即巿股評 港股直擊

【盤房來料】螞蟻上市前續推高阿里股價

雖然美國新一輪刺激經濟方案仍然未有着落,但美股喺個別企業公布優於預期嘅業績,雖然有指科技股估值已過高,但理想嘅業績支持較高嘅估值,只要市場資金仍然充裕,美股打不死嘅強勢料可持續。只係11月初美國總統大選嘅消息或令股市更為波動,暫時喺大選前,預計港股仍然會喺24000至25000之間上落,但去到大選周波幅或擴大至23500至25500水平。

恒指高開126點,輕易收復50日線(約24574),開市後恒指反覆走高,一度升333點,見24903點,創9月7日以來新高,重返100天線(約24697)後回順,升幅縮水至僅餘83點,見24653點半日低。恒指中午收報24747點,升178點;國企指數中午收報10064點,升76點;恒科指半日升12點,報7657點。

重磅藍籌股個別發展,之前因為蘋果新款手機銷情理想,而落鑊炒上手機產業鏈股其中一重要成員瑞聲(02018),半日跌1.5%,藍籌之中跑第尾。另一蘋概股舜宇(02382)半日逆市下跌,半日跌0.3%,值得留意日線圖出咗隻腳,只要今日收市扭轉陰燭走勢轉跌為升,呢一個反彈浪未必咁快玩完。

阿Man曾經推介嘅申洲(02313)半日再創新高,話咗消費股呢期睇高一線,李寧(02331)今日再創新高,安踏(02020)略欠力水,需靠成交配合先有望升破前高位。除咗申洲呢隻藍籌創新高,阿里(09988)亦創303.8元上市新高,預期螞蟻集團招股可繼續帶動科技股氣氛,而阿里股價將繼續被推高,或有望上試310水平。

至於日前公布業績嘅中移動(00941)半日升2%,其實嗰份成績表表現平平,只係內地政府一直提倡「提速降費」所帶動。而對手中國電信(00728)則獲工信部發布批出文件,同意開展物聯網等領域eSIM技術應用服務,半日股價升逾7%。不過阿Man認為就算有5G上客量持續增長,惟收益難有爆炸性增長,股價只係短線炒高,升勢難已長久。

逼近美國大選,有資金再傾向避險,金價亞洲時段曾返1920美元關,金礦股造好。紫金(02899)漲2.7%;招金礦業(01818)飆5.8%;山東黃金(01787)則升2.8%;中國黃金國際(02099)大升15.6%;靈寶黃金(03330)乾升1.8%;SPDR金ETF(02840)漲0.9%;兩倍槓桿的南方黃金(07299)則升1.9%。不過金價能否企穩1920美元為金價後市走勢關鍵,依家追金礦股真係唔建議。

內地展開大型疫苗接種計劃,內地疫苗第一股康希諾(06185)半日升5.3%;藥明生物(02269)創新高,中午大升11.6%,為眾藍籌股升幅之首;康龍化成(03759)也彈升5.4%;至於信達(01801)也揚4.1%;百濟神洲(06160)升2.4%。其實信達跟百濟阿Man一直睇好,值得逢回吐吸納長線持有。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads