美國兩項肺炎疫苗測試忽然刹停，加上民主黨一姐已經turn down咗侵侵同共和黨建議嘅刺激經濟方案，美股因此腳軟，不過回吐壓力唔算大。而中港市場今日焦點係習大大講話，大市高開低走，半日表現反覆。
恒指今早高開159點，見24808點，創9月16日以來新高，開市後回吐，倒跌最多150點，見24498點半日低位，略穿100天線(約24642)及50天線(約24605)後喘穩，其後倒升。恒指中午收報24583點，跌66點；國企指數報9880點，升2點；恒科技半日升0.3%，中午報收7772點。唔知係咪噚日颱風休市關係，缸邊友少咗一日交易，今日要補番條數買貨買番夠本，半日成交增至911.68億元。
藍籌股個別發展，大笨象(00005)瀾泥扶唔上壁，今日逆市跌3%，應該跟內地擬發行60億美元離岸債，傳聞大笨象被拼諸包銷商之列門外。自中美關係惡劣更趨白熱化，大笨象夾喺中間兩邊不是人，睇嚟今後難有運行。傳聞螞蟻集團中港上市計劃，或因中證監延遲審批上市而未能如期本月內招股上市，呢單全球最大集資額IPO若有乜差池，港交所(00388)一嚿肥豬肉咬咗入口都要吐翻出嚟，股價受壓亦正常。
科技股今日表現唔錯，ATMX幾隻龍頭，除小米(01810)升0.7%尚未創新高，其餘三大巨頭半日齊創新高，騰訊(00700)升2.2%、阿里(09988)升1.4%，美團(03690)升0.6%。而京東(09618)被大行調高目標價，半日升1.4%。而手設股則未有因為蘋果公司發布iPhone12而繼續做好，甶而今日有個別股份見回吐，話咗唔高追呢個板塊，十追九伏，整個板塊除咗舜宇(02382)半日升0.3%，其他都見回吐。
之前阿Man提過新能源股或於本月內地五中全會有利國策公布而做好，而北京今日起舉辦國際風能大會，提出年均新增裝機5000萬千瓦以上，風電股獲炒起，金風A(002202.SZ)漲停，H股(02208)飆20.7%；龍源電力(00916)大升4.9%；大唐新能源(01798)升2.5%。當中阿Man比較睇好龍頭股龍源電力。
汽車股阿Man一向只睇好新能源汽車，而龍頭比亞迪(01211)上周首三季業績預測，股價創新高。其他汽車股亦因內地9月乘用車零售銷量按年上升7.3%而上升，有資金流入追捧。其他汽車股阿Man仍有戒心，都係集中火力留住比亞迪已足夠。
麥狄文
(徐狄怡‧證監會持牌人)
