雖然香港放長周末假期間，美國總統侵侵確診Covid-19，不過白宮醫生指其情況持續改善，最快可以喺美國時間星期一出院返白宮休息，而從侵侵上周四確診至今，其Twitter活躍程度不減，工作未有停下，真係病都病得生猛過人。美股雖然喺侵侵確診消息證實後，一度急挫，但其後跌幅收窄，而道指期貨今早更造好向上。港股長假後復市，一度重上24000關升580點，重上10日線(23642點)，可惜係高開低走，24000關得而復失。
恒指高開580點，開市已成功收復10線，不過24039高位一開市出現後，20日線(24102點)阻力大，加上24000樓上缸邊友肯沽唔敢買，令恒指升幅收窄至215點，見23674半日低點。幸而大市低位再有買盤吸納，最終半日升逾三舊。恒指半日收報23801，升342點；國指中午報收9463，升66點；恒科指半日高開低走，先升後跌，半日收市跌6點，報收7080。
今早開市重磅藍籌以友邦(01299)表現最突出，裂口高開81元，不過話咗80元水平邊有咁易企得穩，半日升幅雖縮至4.5%，藍籌中升幅僅次於升5%嘅大笨象(00005)。不過阿Man認為傳統銀行股呢一兩年基本因素好難有乜嘢改善，無貨嘅唔使恨，有貨反而趁反彈考慮逃生啦。金融股以銀行股及保險股比較，更係要揀嚟買，保險股會好些少，而阿Man就梗係兩個板塊都無興趣。
科技股龍頭騰訊(00700)半日升2.7%，阿里(09988)半日升近2%，兩隻巨無霸比較，阿Man短線會吼位阿里，因為集團旗下螞蟻集團本月啟動IPO，點都會帶動阿里做好。至於其他藍籌個別發展，內銀股偏軟，吉利汽車(00175)半日跌3.2%，成份股中包尾。
有報道指，蘋果公司將會本周宣布iPhone 12發布會日期，有傳將於10月13日舉行，不過手機設備股未見有起色，一對手設藍籌孖寶，舜宇(02382)跟瑞聲(02018)分別跌2.4%及1.8%。其他手設股跌幅由0.7%至4%不等。手設股疲弱，唔多唔少跟中芯(00981) 確認供應商受美出口限制，半日跌逾5%，另一晶片製造商華虹(01347)亦跌4.4%。
今日光伏股又有資金追捧，板塊唔少股份又創高，其中北水持重貨嘅福萊特(06865)、仲有信義系嘅信義光能(00968)及信義能源(03868)，半日分別升8.8%、4.1%和6.9%。而一向落後於人嘅協鑫系，保利協鑫(03800)升6.2%；旗下協鑫新能源(00451)則升4.2%，不過講真協鑫一系上面蟹貨多到嚇死人，要揀光伏股，真係唔會考慮協鑫孖寶。
喺北水呢幾日未回歸魚缸次際，估計缸邊友都唔太積極，港股走勢都係反覆，至於乜嘢10月傳統股災月呢啲迷信之說，阿Man一於少理，喺全球QE資金充裕下，實在好難見股災發生，而今年低位亦已喺3月見咗，點計條數，依家都衰唔過三月啦！
麥狄文
(徐狄怡‧證監會持牌人)
