隔晚美股偏軟，市場等緊香港時間今早嘅總統候選人首場辯論，而愈逼近美國總統大選令市場不確定性增加，估計踏入10月份，美股將更趨波動。至於港股噚日再考驗23200支持，結果證明呢個位支持力不俗。今早內地公布9月份製造業PMI升至51.5勝市場預期。中港股市喺第三季最後一個交易日，嘜都要嘜靚啲位，齊齊造好。
恒指高開273點，甫開升幅曾收窄至173點，見23448點半日低，其後跟A股齊齊發力，最多升505點，見23780點半日高位。可借10日線(23705點)得而復失。恒指中午收報23549點，升273點；國企指數報9436點，升155點；恒生科技指數半日升1.6%，報7086，重返七千關企穩。
藍籌方面，今日公布業績嘅新世界發展(00017)半日升3%，表現唔錯，雖然預咗業績喺疫情之下唔會靚仔得去邊，但近年新世界喺企業形象方面，確係下咗唔少功夫，第三代掌舵人除咗搞商場方面打破過往模式，將藝術元素融入，令人眼前一亮之外；喺社會公益方面亦相當有心，自家生產口罩唔單止有品質保證，公司亦回饋社會，客人買幾多口罩，新世界就捐返幾多個去扶助基層有需要人士，做到取之社會，用之社會，公司形象大大提升，單係呢一點已值得多一點管理層溢價。至於其他藍籌股個別發展，大笨象(00005)再重返30元樓下，半日跌0.5%，早兩日講咗有貨好趁機逃生，係要堅持死守，阿Man真係幫你唔到。
內房股今日反彈，市場已消化恒大(03333)事件，對內房板塊資金鏈斷裂憂慮漸消除，而恒大旗下嘅恒大物業擬於港股主板上市，再加埋恒大新能源回A，集資後料可減輕財政壓力。恒大半日急升近15%，恒大汽車(00708)升5.3%；恒騰網絡(00136)升5.2%；不過阿Man繼續食花生，呢系股份只可遠觀，未宜參與玩埋一份。其他內房股亦造好，碧桂園(02007)獲聯席主席楊惠妍連番增持，半日升4%；潤地(01109)飆5.9%為表現最好藍籌；世茂集團(00813)升6%；奧園(03883)升4%。
科技股今日表現唔錯，多得阿里(09988)帶動整個板塊氣氛，阿里搞IR，CFO預計阿里雲喺2021年財政年度可扭虧為盈，而智能物流網絡菜鳥也有望在本財年達成正經營現金流，股價半日升3.2%；ATMX嘅美團(03690)跟小米(01810)半日亦升逾3%，騰訊(00700)則升1.6%。
中國汽車技術研究中心公司副總經理吳志新稱，內地新能源汽車喺未來15年將加速發展，預計2035年新能源汽車將超過1.6億輛，銷量在整體車市佔比將達50%至60%。作為內地電動車龍頭，比亞迪(01211)創新高，半日升一成，由阿Man本月推介至今，其股價由80元水平起步，至今累計升咗五成，咁嘅情況仲有咁好成績，應該無詐形啦。
麥狄文
(徐狄怡‧證監會持牌人)
