熱門:

2020年9月18日 即巿股評 港股直擊

【盤房來料】周末情懷令缸邊友無心戀戰

美股隔晚三大指數都跌,主要係市場對於聯儲局嘅聲明同埋其後嘅政策唔夠滿意,加上有關疫苗發展信息混亂,市場情緒唔穩定,美股三大指數下跌,納指跑輸,重磅科技股跌勢較為顯著。不過港股唔跟足美股行,加上港匯保持強勢,A股又回穩,港股跌兩日後,今日半日回升。

恒指高開40點,開市後曾倒跌45點,見24295點半日低位,之後反彈,半日最多升121點,見24462點,於10 日線(24534點)遇阻力。恒指中午收報24416點,升75點;國企指數報9768點,升36點;恒生科技指數半日變動不大,報7306點。不過今日市況偏向靜靜局,成交額半日只有536億,周末效應令缸邊友唔多願入場。

藍籌股中以保險股最標青,國壽(02628)升2.1%;友邦(01299)升1.4%;平保(02318)升1.5%,係撐起大市嘅功臣。至於噚日跌得最多嘅小米(01810)今日識得反彈,半日升2.4%,阿Man對小米前景有信心,一直堅持喺20至22元之間可以收集,呢個睇法未有改變。有消息指騰訊(00700)投資嘅美國遊戲商epic受到審查,暫時放過微信,唔等於完全放過騰訊,騰訊股價半日跌1.6%,限制住大市升幅。

醫藥股吽吽逗逗咗一排,但自從有個別生物科技股,破例獲納入港股通後,生物科技股先跑出,之前阿Man推介過嘅信達生物(01801)甩咗B,甫入港股通即獲北水大力掃貨,股價早幾日已率先創新高。而另一甩B股百濟神州(06160)亦公布研發數據,試驗結果十分理想,刺激股價半日升近12%。同樣有消息公布嘅君實生物(01877)特瑞普利單抗用於治療軟組織肉瘤,獲美國FDA頒發孤兒藥資格認定,股價升3.9%。復宏漢霖(02696)將公布多項研究數據,半日升近半成。而染藍後嘅藥明生物(02269) 一直無乜起色,但被納入富時中國50指數終於見反彈超過3%,為半日升幅最大藍籌。維亞生物(01873)趁熱鬧,又係一份通告帶動股價半日升7.2%。

阿Man力推嘅比亞迪(01211)一連三日急升後,今日抖抖氣但都唔係幾肯回,半日微升0.1%。相反連阿Man都話唔夠膽參與嘅恒大糸旗下嘅恒大汽車(00708),宣布計劃上科創板上市嘅消息,未帶動股價向上,半日反而跌1.6%。但汽車零件股有資金流入,德昌電機(00179)升2.7%;濰柴動力(02338)升3.1%;耐世特(01316)升1.3%。
今日大市都係偏向靜局,反正限聚令今日開始放鬆,預計唔少已有抗疫疲勞嘅香港人,將趁周末去玩番餐,會否報復式消費未知,但周末情懷係缸邊友入市意欲大減,不如準備好個等收工心情,放工一於去鬆鬆。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads