熱門:

2020年9月14日 即巿股評 港股直擊

【盤房來料】坐住悶贏好過流住淚等返家鄉

呢個星期唔單止係多國央行將於星期四議息,被投資者視為超級星期四,而明日就係美國針對中國華為新禁令將正式生效,屆時台積電等半導體廠商將停止向華為供應5G晶片。同時中國影音應用程式抖音海外版TikTok,出售美國業務大限將至,而微軟喺周日剛發表聲明,指TikTok母公司字節跳動已拒絕微軟收購其美國業務;目前僅餘甲骨文成為唯一潛在買家。美國暫時未有肯讓步,而中國又唔想跪低,所以有關字節跳動出售美國TikTok業務能否順利完成,暫時睇落去唔多樂觀。不過蘋果明晚為2020年產品發布會,雖然有消息指iPhone12可能延遲發布,但仍有其他新產品如新一代iPad及iWatch將吸引市場注目。

而上周五美股個別發展,A股今早造好,帶動港股喺上周試咗24200點支持後反彈,恒指半日收市成功收復100日線(24666點)。早段恒指高開65點後,見過24556點半日低位,其後持續向好,愈升愈有,更一度升247點高見24750點,幾乎連10日線(24720點)亦成功收復。恒指中午收市剛好踩界報收24666點,升163點;國指升9800點,升47點;恒科指則升127點,中午報收7306點。不過半日成交額都係592億元唔算多,呢個星期多個重要消息公布,缸邊友傾向審慎。

科技股向好回升,不過見到恒騰(00136)半日升逾兩成,阿Man有啲戒心,皆因恒大系出咗名唔易炒,加上恒大(03333)呢一系除咗恒大業務一直透明穩定之外,之前搞緊互聯網健康產業嘅恒大健康,搞搞吓又變咗全力推動新能源汽車製造業務,恒騰未轉手畀恒大前,公司業務轉完又轉,更加難捉摸,阿Man寧可炒少隻都唔想夾硬嚟,老實講,阿Man對於呢啲變身股真係無乜興趣。

科技龍頭騰訊(00700)休息咗咁耐,一係唔識郁,一係半日升逾3%,點會估得到;另一對手機設備股孖寶瑞聲(02018)同舜宇(02382)趁蘋果發布會炒返轉,其他科技股表現唔錯,睇嚟科技股調整有機會告一段落。內需股今日亦有配星表現,上周阿Man推介嘅海底撈(06862)創新高後,升幅縮水,有機會升完一浸又要抖抖。信義能源(03868)向國壽(02628)及高瓴資本折讓8%配股,引入大孖沙做股東,股價半日急升14%再創新高。

由於呢個星期有咁多大件發生,上兩個星期減咗倉嘅投資者,有心再入市加注都係睇定啲,反而持有嘅貨都一直錄得盈利,一動不如一靜,坐住贏錢悶係悶啲,但都好過流住眼流等返家鄉。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads