美股上周五做好，納指跟標指再創收市新高，科技股繼續強勢。日經指數喺上周五安倍晉三宣布請辭後急跌逾600點，今日反彈逾400點，主要係有消息指即使安倍離開，央行仍會維持目前嘅貨幣政策。而今早中國公布8月非製造業PMI升至55.2勝預期，以及離岸人民幣(CNH)喺美滙指數疲弱下，再創逾7個月高位，帶動港股上升，恒指一度重上250日線(25779)，重返牛熊分界線之上。
恒指今早高開310點後反覆向上，一度升425點，見25847點半日高位，亦創一個半月高位，其後升幅收窄至274點，250日線得而復失。中午恒指報收25767點，升345點；國指報收10311點，升129點，恒生科技股指數升172點，報收7753點。
以為幾大內銀股喺噚日派中期成績表，十年以嚟賺得最少，以為一定拖死港股，點知市場早有心理準備內銀股今年要「讓利」，幾隻銀行股又唔算太差，中行(03988)更加有得升，內銀股總算無阻住個市向上突破。其他重磅藍籌股普遍做好，友邦(01299)、大笨象(00005)、中移動(00941)跟平保(02318)等，分別升0.4%至1.9%不等。阿Man今年捉到隻港交所(00388)正一正，講緊並唔係3月份大市見底，呼籲大家喺210元樓下上車嗰一轉，反而係5月初派完成績表兼小加同志宣布明年合約到期走人嘅消息，港交所股價碌咗落250元樓下，大聲呼叫呢啲位上車無得輸。其後就傳出美國打壓中概股，逼使中概股從美股回落港股或A股上市嘅消息，港交所股價從此平步青雲，今日勁升十幾蚊創上市新高397.8元，中午報收394.6元，升3.6%，話咗港交所跟ATMX五大巨頭，缺一不可，若然有跟足阿Man指示，港交所由250樓下坐上嚟，輕輕鬆鬆咁就賺六成。
ATMX之前一路係美團(03690)放得最前，跑贏阿里(09988)同小米(01810)幾條街，但自從阿里跟小米有落實下周一被納入恒指成份股後，兩股齊齊創上市新高，尤其小米有北水瘋狂掃貨，比起未有北水入場嘅阿里，小米又行得再快一步，半日升6.7%，創24元上市新高。小米極有可能學似其他股份，遲早會返上海科創板上市，但未有日A股前，北水要買貨，亦有幫襯港股。而阿里巴巴因第二上市關係，一直未被納內港股通，但有消息阿里喺美國嗰邊買開BABA嘅投資者，開始嚟港股呢邊換入阿里巴巴，預其可維持升勢一時間。
當恒指服務公司宣布即將加入恒綜指名單嘅生物科技股，要入港股通首要條件係公司唔可以無收入同盈利，咁阿Man仲好天真咁諗已經甩B嘅信達生物(01801)同埋，早已有收入嘅百濟神洲(06160)好大機會加入港股通。點知恒指服務公司上周五收市後突然公布。8隻生物科技股按照港交所喺8月14日嘅指數通告指引，按上市規則第18A章，上市嘅生物科技公司未知符合互聯互通資格與否，下周一唔會將呢8隻生科股納入相關指數，即係信達生物、啟明醫療(02500)、百濟神州(06160)、康希諾生物(06185)、康方生物(09926)、康寧傑瑞製藥(09966)、諾誠健華(09969)、沛嘉醫療(09996)，連互聯互通基本入場券都冇，短期北水都冇得入場。不過信達本身業務唔差，有泊住幾個大碼頭嘅世界級藥企有合作，前景唔會差，話唔定下跌正係上車好機會。即係咁之前康希諾生物(06185)一樣無北水埋位，但股價上半年升咗四倍，信達仲守得住條20日線及50日線，有貨亦唔要太擔心。
麥狄文
(徐狄怡‧證監會持牌人)
