人家美股隔晚又再升，道指早段曾挫逾百點，其後止跌回升，倒升收市，而標指跟納指則再創新高，但係港股就跟唔到，雖然今日A股正正常常無拖累港股，但美國宣布將24間中國企業出口管制黑名單，當中包括喺香港上市嘅中交建(01800)嘅五間子公司，中國電子科技集團公司第七研究所（CETC-7）及其兩間下屬研究所、北京環佳電信有限公司等。市場擔心中美關係再度惡化，港股今早一度跌逾300點，不過10日線(25284)見支持，中午收市前跌幅收窄。
恒指低開22點，報25469點，已係半日高位，其後沽壓湧現，拖累恒指跌幅擴大至305點，見25186半日低位。不過10日線失而復得，唔少股份低位有承接，跌幅收窄一半， 10日線失而復得。恒指中午收報25331點，跌159點；國企指數報10220點，跌79；恒生科技指數半日收報7565點，升290點。
藍籌股大部份腳軟，大笨象(00005)跟友邦(01299)分別跌1.6%及1%，建行(00939)跌0.7%，而聯通(00762)跟中移動(00941)跌3.2%及2%，前者係表現最差藍籌股。其他重磅股除咗騰訊(00700)之外，普遍走軟。
之前阿Man講過千祈唔好高追濠賭股，今日高追伏味濃，今日呢個板塊全線下跌，主要係中國文化和旅遊部公布，將會制定跨境賭博旅遊點「黑名單」制度，並會採取相應的旅遊限制措施。以為下月開始澳門又可以中門大開吸引遊客賭客到訪，但始終都有限制唔夠free，濠賭股全線回落，而喺柬埔寨開賭嘅金界(03918)半日更急跌7.8%。
隔晚美國軟件製造商Salesforce季績遠勝預期，加上下周一開始被納入道指成份股，收市爆升26%，帶動港股嘅軟件股及科技股逆市上升。眾安在線(06060)業績大躍進，中期多賺超過400%，勁過之前發嘅盈喜多多聲，股價半日大升13.1%，可惜未能企穩50元之上，升勢或未能延續。其他軟件股普遍上升，升幅閒閒地5%或以上。至於科技股中以小米(01810)表現最好，除咗業績標青之外，市場對小米商業模式亦受落，其IoT業務將成為集團未來賣點，更令公司由手機股蛻變為多元化科技企業。中金為小米估值平反，調升其目標價高一倍至30元，股價半日勁升13%。之前阿Man已表示對小米後市有信心，股價不僅可重返水面，升越17元招股價，要再新高亦無難度，半日小米最高見21.75元，跟上市高位22.2元只有一步之距。之前成日提住ATMX四股要儲齊貨坐穩，ATM已先後創新高，目前只欠小米埋門一腳，預期下周加入藍籌大家庭前，小米已有機見新高。
麥狄文
(徐狄怡‧證監會持牌人)
