美股隔晚表現反覆，道指早段升逾百點後倒跌，標指跟納指則創紀錄高位後掉頭，主要係聯儲局7月份貨幣政策會議紀錄，指疫情將嚴重地衝擊美國經濟活動，而侵侵嘅財政支持政策亦有失效風險。若然疫情持續，美國將面臨顯著嘅金融脆弱性風險，預計今年下半年經濟復甦力度轉弱。但係環球央行放水，持續低息環境有助股市得到支持，阿Man認為美股喺11月總統大選前都唔死得，但大選結果將左右美股表現，愈逼近11月就愈要小心。
美股回少少，但港股跟A股就跌得較為顯著，主要係內地全面降準嘅機會下跌，而內地8月LPR維持不變，已經係連續四個月郁都唔郁。有內地分析指，預期今年內地貨幣投放主要透過公開市場逆回購，及中期借貸便利(MLF)等操作進行，再全面降準應唔大機會，可能係怕再放水可能引發通脹。
恒指低開123點，見25055點已經係半日高位，大市低開低走，跌幅持續擴大，失守25000關即穿10日(約25505)及50日線(約24989)，再失守埋20日線(約24888)。盤中一度跌539點，見24638點半日低位，中午恒指報收24662點，跌516點；國指則跌209點，報10103點；恒生科技指數則跌36點，半日報收7114點。
友邦(01299)中期業績差過預期，股價半日跌4.6%，已佔去恒指119點跌幅；另一重磅股大笨象(00005)又跌1.3%，話咗之前反彈只係曇花一現，一直未扭轉弱勢。中移動(00941)連續兩個月淨增客戶數目下降，半日跌2.2%。內地全面降準機會大減，內銀股當然遭殃，A股腳軟，健康牛唔多健康，內險股亦走弱。唔係阿Man要睇死呢批傳統股，主要係實體經濟疲弱，傳統股點會有運行。
至於新經濟股中嘅科技股，今日個別發展，小米(01810)自半爆冷染藍後，北水買盤積極，股價已成功重返水面，重上招股價17元之上，半日再升至最高18.46元，係近兩年高位。華為被美國封殺，小米反而成為受惠者，主要係西方國家忌諱華為嘅領先5G技術，相對小米生產嘅手機或小家電，都唔屬於乜嘢高科技產品，被美國針對機會有限，呢個亦係近日小米逆市走強嘅原因。阿Man早於小米未染藍前，已睇好小米今年表現，話晒加入咗藍籌大家庭，重上招股價係最低消費，只要北水繼續捧場，小米重返上市高位即20至22元水平指日可待。
而阿Man日前推介有機會被納入港股通嘅恒綜指新貴信達生物(01801)果然係買得合時，股價已重返50元水平之上，一於繼續持有至下月正式加入恒綜指，唔排除屆時順手入埋港股通。而另一隻同樣有潛質被納入港股通嘅恒綜指新貴係康基醫療(09997)，作為全中國最大嘅國內微創外科手術器械及配件(MISIA)平台，係北水鍾愛嘅類型。趁股價仲喺30元樓下，接近上市以嚟低位，絕對係低吸良機。跟博信達生物咁嘅道理，現價買入跌穿27.5元止蝕，1元博重返上市高位35元水平，夠晒值博率有數圍。
麥狄文
(徐狄怡‧證監會持牌人)
