美股呢啲真係話彈就彈，當唔少淡友睇死納指見頂就打柴，隔晚一下拗腰上番晒去，始終守住條上升軌，淡友以為沽納指可以贏大鑊，基本上八成機會見財化水。納指反彈超過2%，標指更曾升穿收市紀錄高位。港股兩日累升超過800點，一如所料25500-25800點阻力好難一下子突破，今早高開低走，睇嚟又要喺25000-25200附近抖抖氣。
恒指今早高開266點，見超過三星期高位25490點，但喺25500前遇阻力掉頭回落，開市唔夠半粒鐘已倒跌，最多跌77點，見半日低位25166點。恒指中午報25213點，跌30點；國企指數報10263點，升47點；恒生科技指數半日收報7079點，升68點。
藍籌股今日只有三部紅色電話表現較突出，聯通(00762)半日勁升23%，遠遠拋離其他藍籌股，已經連升四個交易日，主要係上半年業績超出預期，得到大行祝福。而中移動(00941)中午公布上半年純利微跌0.5%，股價半日升逾5%，已經係三部紅色電話之中表現最曳，而中電信(00728)半日升近一成，下周二先派成績表，睇款成績唔會差得去邊。其他藍籌股普遍下跌，大笨象(00005)噚日勁升超過4%後，今日無以為繼，股價半跌1.3%。其他重磅藍籌股亦見下跌。除咗創科(00669)派完成績表又有大行唱好兼調高目標價，半日升近一成。
明日就係恒指服務公司季檢，中金報告指信置(00083)、恒隆地產(00101)和新世界(00017)有機會被踢出藍籌，半日分別挫2.5%、3.7%和1.5%，睇法跟阿Man接近，不過阿Man認為太古A(00019)相對新世界更大機會出局，一來屬資英資公司，喺港股以中資主導嘅今時今日，留低呢間公司做藍籌，有啲篤眼篤鼻。唔單止有機會掉失藍籌身份嘅地產股腳軟，連長實(01113)跟新地(00016)呢啲本地地主大佬，亦分別下跌1.7%及0.7%。
騰訊(00700)業績又好過預期，究竟係大行高估疫情對騰訊嘅影響，抑或公司自己本事，似乎係騰訊業績本來就係強勁有關。不過騰訊業績出色唔代表可以撐起股價，皆因目前騰訊佔恒指比例已超過10%，今次恒指做rebalancing，追蹤指數嘅基金，無奈地都要減持騰訊。不過騰訊作獲多間大行唱好，一旦股價升守510元，唔排除有低過大牛價嘅靚位上車。
之前中芯(00981)A股掛牌後，中芯喺港股高位回落，節節退敗，股價跌至25元喘定見支持，但要重返高位45元，睇怕要交得出亮麗業績先有機會支持公司咁高估值。同樣道理，康希諾(06185)今日日A股登陸上海科創板，既然歷史任務完成。喺港股呢邊亦唔精神，有別於中芯喺A股掛牌當日先出事，康希諾股價其實已連跌多日，目前關鍵支持位為200元，上半場已失守，若然下半場未能收復失地，其股價進有機會進一步下試180-185元。
麥狄文
(徐狄怡‧證監會持牌人)
