熱門:

2020年8月6日 即巿股評 港股直擊

【盤房來料】美國威脅將中國app下架 未必可打擊內地科企

隔晚美股做好,除咗疫苖研製進展理想之外,大部份已公布業績嘅標指成份股企業成績都比預期好,推動美股三大指數上升,納指更連升四日,再創收市新高。不過港股今日高開低走,主要係市場擔心美國再出招針對中國企業,國務卿蓬佩奧表示,美國將會禁止美國國內嘅應用程式商店,出現中國應用程式,又建議吊銷中國電信(00728)等電訊商喺美國嘅營運許可。

恒指高開98點,報25201,見完呢個半日高位即掉頭,失守20日線(約25050)後跌勢加劇,加上A股又插水,港股愈插愈深,半日低位見24641點,跌461點,跌穿10日線(約24747)及50日線(約24791)滙聚支持。恒指半日報收24692點,跌409點;國企指數收報10115,跌141點;恒生科技指數半日報收7474,跌72點。

華府希望將有可疑嘅中國軟件從美國應用程式商店下架,同時開名阿里巴巴(09988)、中移動(00941)及中電信,建議美企避免同呢幾間公司接觸、收集、儲存及處理跟美國有關嘅敏感資料。呢個消息一傳出,嚇到整個板塊腳軟,其實阿Man反而覺得今日係買貨好機會。雖然華府嘅舉動確係令個別科技股平添不明朗因素,但亦有唔受影響嘅股份可以留意。好似逆市上升嘅美團(03690),應用程式主要針對內地市場,美國根本無打壓嘅必要。而平安好醫生(01833)及開始聚焦大健康生活圈嘅眾安在線(06060)同樣跌得無辜,因為服務對象都係中國民眾,睇怕都唔會有外國人會用到眾安同平安好醫生嘅線上服務,而兩間公司喺內地市場發展潛大龐大,今日股價回軟,正好提供上車機會。

不過騰訊(00700)旗下嘅微信社交平台應用程式,係一個全球普及嘅app,一旦遭美國封殺,都咪話唔頭痕。至於阿里巴巴(09988)嘅電商平台淘寶及天貓網,同樣係以內地市場為主,只不過被開晒名叫美企避免接觸,又確係棘手咗啲,但阿里始終係藍籌新貴大熱門,股價半日跌0.6%唔算多。而另一準備染藍嘅科指權重股小米(01810),早段一度逼近16元,但跟隨整個科網板塊回軟,但股價仍守15.5元之上,趁低吸納買盤相當積極。

除咗科技股之外,手機設備股沽壓亦大,舜宇(02382)半日跌逾3%,其他瑞聲(02018)、比亞迪電子(00285)半日回落超過1%。手遊股今日有資金追捧,IGG(00799)半日升兩成,公石上半年盈利大幅增長逾八成,兼且派特別股息25.1港仙,連同中期息25.1港仙 ,合共50.2港仙,較去年同期派息大幅增加,難怪吸引好息之徒入場。整個手遊板塊股份均向上,反而半新股祖龍娛樂(09990)隨大市下跌,重返24元樓下,不過沽壓唔算大,刻意唔跟其他手遊股逆市做好,似乘機震走散戶多過大戶散水。阿Man認為淡定月錢剩,雖然美國想打科技冷戰牌,但內地科網公司主要市場仍然喺中國,內地市場發展前景理想,話之你美國將所有中國app下架,對相關公司影響有限。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads