熱門:

2020年8月4日 即巿股評 港股直擊

【盤房來料】月中恒指季檢 AMX先落鑊熱身

隔晩美股喺企業併購消息同科技股業績普遍優於預期下做好,美股三大指數上升,納指更連升四日再創收市新高。雖然華府跟國會仍未就新一輪刺激方案達成協議,但白宮正研究若然國會議員不採取行動,能否繞過國會,由侵侵本人自行延長失業救濟及保護租客免受驅逐措施是否可行。聽聞國會收到風後,已再次埋枱講數,希望盡快達成協議。而有關微軟收購Tik Tok美國業務獲侵侵放行,微軟股價升逾5%。港股今日食住美股個勢,再加埋A股做好,終止三日跌勢,今早終見反彈。

恒指開206點,最多升233點,見24691點半日高位,可惜喺50日線(24717)前遇阻力,升勢放緩至僅剩81點升幅,見半日低位24539點。中午恒指報收24659點,升201點;國指報收10157點,升123點。科技指數升79點,半日報收7371點。

幾件科指重磅股以美團(03690)表現最強,盤中再創上市新高214.6元,中午報收213.2元升逾6%。阿里巴巴(09988)半日亦升3.3%,今日又係裂跳升;而小米(01810)則升1%,ATMX之中要數小米最落後,仍未收復20日線(15.7),真係要加多把勁。

阿Man今年講咗N次貪新忘舊係無得輸,相信仍持有大笨象(00005)股份嘅小股東,真係別有一番滋味在心頭。大笨象呢隻被視為穩陣收息之選嘅傳統金融股,噚日派完成績表後繼續捱沽,半日盤中最多跌近4%,見32.1元11年低位。中午報收32.55元,跌2.5%,再穿海嘯價。旗下恒生(00011)減少派息,唔排除被好息之徒捨棄,同樣無運行。難兄難弟今日雙雙破底,口痕友話唔知大笨象跌破海嘯價後,會否連08年供股價28元都穿埋,當年嘅所謂鐵底供股價,如今唔知仲有幾硬淨。

本地地主佬今日見反彈,原因係肺炎確診個案回落至百位數之下,不過呢個板塊反彈再有睇頭都好,阿Man認為避之則吉。尤其係月中恒指季檢將會加入重磅科技股AMX,一次過納入三隻或分段排住隊入都好,本地地產股係被踢出局嘅熱門之選,尤其係市值較低,業績表現特別差嘅次一線地主。

之前內需股有炒作,乳業股係唔少大行心水,誰知呢期大隻乳業股唔炒住,炒迷你乳業股,加上伊利入股中地乳業(01492)噚日已掀起迷你乳業股炒風,今日股價再升兩成半,而其他細細粒乳業股,全部錄得一成以上升幅。
阿Man都係集中吼住科技同生化藥股兩個新經濟板塊,今年股價翻幾番嘅微創醫療(00853)近日見北水頻頻減持,唔知係咪有同類新股康基醫療(09997)接力。當然康基暫時未有耐被納入港股通,不過公司有錢賺而市值亦有三百幾億,再加埋流通量不俗,加入港股通係遲早問題,唔怪得之見有買盤密密收集,依家唔買等北水入場大要捱貴價。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads