美股隔晚下跌，市場總係會為升跌搵原因，從表面證據睇，美股腳軟係因為由共和黨人提出嘅新一輪刺激經濟方案，對家唔滿意嘅同時，連自己友都有意見，要花啲時間去打修正球，恐怕短期無法實施。加上聯儲局聯儲局宣布將緊急貸款計劃延長至12月31日，令市場擔憂經濟前景喺疫情影響下，需要更長時間恢復，而美國7月消費者信心指數由6月經修訂後嘅98.3點跌至92.6點，較預期95點低。幾個因素令到美股受壓。
不過阿Man認為阻礙美股隔晚上升嘅真兇，係噚日大玩過山車嘅黃金走勢。金價噚日喺亞洲時段曾創1981美元新高後急回，落番去1900邊皮，低見1906元，以為黃金升勢告一段落，資金有望回流股市。豈料到美國時段，金價再次躍起，更升至1944.6元收市，並創收市新高，睇嚟資金仍然留戀黃金，美股自然無運行。金價暴漲背後帶出另一個訊息，就係美國無限QE令市場擔心美元霸主地位不保，美元走弱引發潛在貶值擔憂，美股乃美元資產，加上累積升幅巨大，難免令市場有戒心。
港元跟美元掛勾，變相港股亦屬美元資產，只係港股估值遠較美股低，基金佬現水平無乜理由要質死港股。只係今日內地股市升逾1%，港股都跟唔到。恒指低開62點報24710，跌幅曾擴至101點，見半日低位24671點，幸而守住50日線(24666點)。加上A股向好，港股收復失地，曾倒升132點，高見24905點，可惜高位未見資金追貨，反而有獲利沽盤套現。恒指中午報收24801點，升29點；國指半日升24收10176；恒生科技指數今早高見7067點，創推出後新高，半日報收7025點，升12點，半日成交額縮水至560.2億元。
大笨象(00005)噚日回落至海嘯以嚟低位後，今日半場反彈近2%，其他藍籌股普遍做好，但重磅騰訊(00700)跌1.4%，已抵銷大部份升幅。隔晚納指再失10日及20日平均線，香港呢邊嘅科技股亦腳軟，睇嚟科技股有排抖，需要較長時間整固，順便修正吓啲技術指標，畢竟之前呢個幾月，整個板塊炒到出煙。
預咗結算前一兩日個市唔上唔落悶死人，竟然連一直最夠鑊氣嘅科技股都要抖氣，缸邊友無股好炒，阿Man聽聞有行家見悶成咁，有意約腳攻打四方城，誰知忽然醒起今日開始再收緊限聚令至只限二人，即係乜都唔使諗，不如提早收工返屋企瞓瞓。
麥狄文
(徐狄怡‧證監會持牌人)
