上周五美股唔多精神，三大指數下跌，而納指更跌穿20日線呢個較關鍵支持，若然今晩美股再有乜冬瓜豆腐，都咪話唔牙煙。不過美國財長已爆響口，美國共和黨版本第四輪經濟刺激法案，將於美國當地時間今晚提出，或多或少幫到美股撐一撐。至於港股呢邊彈唔起，高開後即見減磅沽盤，即使內地6月工業企業利潤連升兩個月，A股做好亦帶動唔到港股回升。
恒指高開204點，最多升267點見半日高位24972點，受制25000，其後倒跌最多51點，低見24654點半日低位，仍守50日線(24631)。中午恒指報收24683點，跌21點；國指則升31點，報10111點。至於今日登場嘅恒生科技股指數，先升後跌，中午報收6784點，跌78點。不過半日成交額不足700億元，沽壓唔算好大。
重磅股大笨象(00005)跌2.5%，大笨象最近陷入兩面不是人嘅局面，市場既擔心美國制裁或懲罰佢，同時大笨象自己又怕死，先查客戶當中有否政治背景敏感，有意送走呢班客戶。至於港交所(00388)半日回1.3%唔算跌得多，留意353元失守的話，有機會向340-345元尋找支持。而中石油(00857)半日跌3.5%，係表現最差藍籌股，話咗石油股無運行，唔好話阿Man睇死呢個板塊。反而建行(00939)半日升逾1%，但以勢輪勢，暫時仍然無睇頭。由高位回一成，又重返5.8至6.2元之間呢個區間運行。
恒生科技指數今日登場嚟個反高潮，30隻指數成份股高開低走，暫時只得重磅舜宇光學(02382)仍錄得升幅。ATMX表現令人失望，當中阿Man睇好嘅小米(01810)表現特別差，半日跌2%，失守15元短線支持位，若然今日收市失守14.5元都好濕滯。其他成份股跌幅閒閒地2%以上，估計喺未有發行商推出科指相關產品前，科指成份股嘅沽壓難免沽較重。
金價今早最高見1944.71美元，創歷史新高，金礦股有追捧，山東黃金(01787)含金量最高，半日升逾一成。至於阿Man之前建議長期持有嘅SPDR金ETF(02840)亦升1.8%，不過有兩倍槓桿嘅南方黃金ETF(07299)更受歡迎，升幅超過3%。喺地緣政治因素不穩定下，金價易升難跌，今年2000美元目標都無乜走雞。
上周阿Man大力推介半新股思摩爾(06969)，結果思摩爾透過快速納入機制，今日被納入恒生綜合指數，並成為港股通一份子。話咗北水掃貨有錢就任性，半日股價升13.5%，再創43.4元新高，睇嚟此股要入伍無難道，能否坐五望六，要睇北水對佢有幾寵愛。
麥狄文
(徐狄怡‧證監會持牌人)
