美股隔晚下跌，道指跟標指跌逾1%，納指跌逾2%，尤其升晒上神枱嘅科技股，回吐壓力更顯著。本來喺業績期之際，唔少科技股已借頭借路回調整固，依家仲要加埋中美關係惡化，中國通知美國關閉駐成都總領事館，以反制美國要求中國關閉駐休斯頓領事館。而南海局勢愈趨緊張，美國派出五格戰機飛越南海領空，解方軍則實彈演習作回應，市場擔心中美雙方於南海擦槍走火，港股低開後，雖然收窄跌幅，但其後因為多重負面消息而進一步下挫。
恒指低開222點，跌幅一度收窄至161點，見25101點半日高位，但A股愈跌愈多，港股再次失守25000關，最多跌529點，見24733點半日低位，為7月2日以嚟新低。恒指中午收報24801點，跌461點；國企指數報10119點，跌205點。
藍籌股跌勢全面，港交所(00388)跟國壽(02628)齊齊跌逾3%，友邦(01299)跟大笨象(00005)則齊跌超過1%。藍燈籠中移動(00941)則逆市升0.9%，睇見唔多開胃。藍籌股中表現最差係中生製藥(01177)，半日跌7.4%，集團首席執行長、執行董事及股東謝炳旗下Validated Profits Limited，擬按配售價每股10.5元，配售3億股股份，涉資31.5億元。配售價較昨日收市價10.88元，折讓3.49%。股東配售舊股，通常被市場視為管理層認為公司現價己到頂，甚至唔睇好公司前景，不過中生製藥8月3日將派發紅股，股東收取紅股前先減持股份套現，收取紅股後，控股權又回升番少少。若然呢3億股貨係落入強中手，中生製藥消化咗股東減持消息後，唔排除可以回升。最緊要係公司業務發展保持理想進度，盈利未來仍有增長，如果喺呢啲基本因素無大改變下，股東減持所引起嘅跌勢，應該好快可以修正。
而下周一起獲納入港股通嘅思摩爾(06969)，今早一度逆市再創40元上市新高，但亦不敵大市跌勢，中午回落至37元水平之下。今日呢下回調，正好畀缸邊友一個上尾班車嘅好機會。下周待北水入場，好期待想睇下之前思摩爾其中一個包銷商，曾發報告建議買入，並給予高達58元目標價，能否喺北水入場後達標。
伸手接貨博一博
雖然周一推出科技股指數，但喺美股科技股急回下，香港呢邊嘅科技股亦腳軟，ATMX全部下跌，騰訊(00700)半日跌4.6%，已拖低大市142點。其他指數成份股閒閒地跌2%以上，呢個時候係減貨定係伸手接貨，阿Man選擇後者博一博。尤其睇番呢堆科技股，半日低位仍未重返上周四低位，而恒指已穿晒上周四低位。睇埋下半場相關股份守唔守上周四低位，守到住有得諗，最多咪用上周四Day Low作止蝕參巧，試試搭番程科技指數順風車。
麥狄文
(徐狄怡‧證監會持牌人)
