熱門:

2020年7月23日 即巿股評 港股直擊

【盤房來料】中美關係消息震港股 科網醫療股即有位上車

噚日港股下半場臨收市前大半粒鐘,忽然傳嚟中國喺美國休斯頓領使館疑似發生火警,揭發咗美國原來以保護美國知識產權及公民私隱作理由,要求中國72小時內關閉休斯頓領事館。而所謂火警只不過係中方領事館人員喺領館後欄燒文件。其實睇電影都見過呢啲情節,為免機密文件外洩,走佬前一把火燒晒就乾手淨腳。

中國嚴厲指責美國咁做係挑機,不過呢件事嘅起源係美國外交人員欲重返武漢美駐中領事館時,被要求接受檢疫並留下DNA樣本,美方唔肯就犯,又講唔掂數,唯有向中國報復。中美雙方玩到鬥關閉對方領事館,市場憂慮中美關係持續惡化,噚日港股終倒跌收場,恒指插水577點。不過呢件事華爾街班完全當無到,美股三大指數上升,道指更重返27000大關。

恒指見美股無乜事,今朝高開反彈177點,半日最多升288點,報25346點,可惜10日(25342點)及20日(25331點)線未能企穩。A股下跌拖累港股腳軟,大市轉升為跌,最多跌65點,略穿25000低見24992點半日低位。正如阿Man所講,個市邊有咁快死,加上炒股唔炒市,恒指半日報收25151點,升93點或;國企指數收報10270,升27點。

其實中美雙方爭拗已經唔係一朝一夕嘅事,自中美貿易戰開打以嚟,雙方爭拗稍有風吹草動,必對香港帶嚟震盪,缸邊友都應該習以為常。不過港股再失守10日及20日線,要盡快收復失地先可以擺脫險境,話就話炒股唔炒市,但若然大市持續走弱並失重要支持,定必影響整體氣氛。

不過阿Man對於新經濟股跟科網股以及醫療股仍充滿信心,尤其下周推出科技指數,成份股尤其重磅嗰幾隻,必定成為資金追捧對象。噚日大市午後震盪,反而為呢堆熱炒股提供上車機會。阿Man對於新股思摩爾(06969)前景睇好,噚日收市後恒指服務公司宣布透過快速納入機制,將思摩爾納入恒生綜合指數、恒生消費品製造及服務業指數及恒生港股通新經濟指數,並於下周一(27日)起生效。入得港股通即將迎來北水,睇嚟股價沒有最高只有更高,內地曾有券商報告目標價高達58元,只不過券商亦為其包銷商,最終報告迫於無奈要下架。不過思摩爾未來幾年可維持高增長,呢兩日好買定貨,否則下周北水入場,更加要鬧快搶。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads