熱門:

2020年7月10日 即巿股評 港股直擊

【盤房來料】大市急升後回吐或考驗10日線

美國疫情喺經濟活動重啟後,再度爆發另一波更凶猛疫情,市場觀望各州政府會否再度收緊隔離措施,甚至再度封城。不過侵侵已表明立場,唔贊成再次暫停經濟活動,皆因美國實難再承受經濟活動二度暫停。受疫情再度爆發打擊,傳統股再度回軟,道指隔晚跌逾300點,但納指則繼續跑贏,升87點再創收市新高;美股個別發展。港股喺美國受壓及A股回調下,半日失守二萬六關。

恒指低開278點,其後跌幅曾收窄至72點,見26137點半日高位,但A股跌幅擴大至1%,恒指一度跌351點,低見25858點,250日線(26064點)得而復失。中午恒指報收25902點,跌307點;國指則報收10607點,跌174點。
今日七件新丁登場,當中以超額1895倍歐康維視生物(01477)最旺場,開市43元係半日高位,較招股價14.66元勁升超過兩倍,個個中奬搶住沽貨,半日收37.8元,都較招股價升1.58倍。另一隻較受歡迎係做電子煙嘅思摩爾國際(06969)中午報28.1元,較招股價高1.27倍。其餘新丁都較招股價有進帳,除咗唯一嘅創仔股中國蜀塔(08623)中午報0.22元,較招股價低26.7%。阿Man幾時都係咁話,創仔質素麻麻,就算有升都相當人為,全靠自己友圍飛作歹,根本無得搞。

隔晚美股納指雖然仍上升,但唔少股份都高位回落見沽壓,香港呢邊嘅科技股表現差不多,ATMX個別發展,小米(01810)終於上返水面,半日一度高見17.5元,中中午報升1.1%,預計喺17元水平將要整固一吓,畢竟早兩日升勢都幾急。至於美團(03690)低開後迅速回升,並創213.4元新高,中午升幅收窄至0.4%。阿里(09988)跟騰訊(00700)則見回吐,半日兩股分別跌1.8%及1.7%。

講咗幾日嘅美國制裁中國及香港措施,終於先敲定禁止美國政府使用包括華為和中興(00763)等5間中資企業產品,中興股價當然要插水,阿Man早講咗中興一直處於中美關係風眼之中,市場上選擇多的是,唔需要一定揀佢嚟買。手機設備股及5G股亦被拖累,舜宇(02382)跟瑞聲(02018)半日分別跌3.4%及1.3%。至於長期未見起色嘅鐵塔(00788),由1.37元低位反彈至1.7元之前又掉頭,其實鐵塔喺1.5元至1.7元之間嘅蟹貨,多到兩個陽澄湖都裝唔晒,短期唔會有運行。

內地券商股今日回吐,主要都係跟住A股步伐,不過呢個板塊回吐,正好畀大家一個上車機會,阿Man較為睇好嘅係有併購概念嘅中信証券(06030),19元邊可以收集;而另一隻內地券商心水係跟騰訊有合作嘅中金(03908),18至18.5元睇位有冇位上車。

至於大市重返250日線之下,預料將考驗25800水平,若然失守則再向10日線(25418點)出發尋找支持,只要大市仍守25300至25500水平,目前只係急升後回吐,中線向上形態未扭轉,唔需要太過大驚小怪。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads