熱門:

2020年7月7日 即巿股評 港股直擊

【盤房來料】A股牛氣沖天 港股豈能落後

美股放完假返嚟又升過,雖然獨立日假期時,肺炎感染及確診人數上升,疫情繼續爆發,但經濟數據及就業數據較預期理想,市場憧憬經濟復甦進度符合預期,樂觀情緒蓋過負面疫情消息,美股三大指數再升,標指跟納指連升四日,納指再創收市新高。加上內地股市愈升愈有,上證指數突破3000點後頭也不回,深滬兩地股市半日成交額已突破萬億元人仔,氣氛熾熱下,港股又豈能落後於人。

港股連四日,恒指累計升逾2000點,並重上牛熊分界線250日線(26093點)之上,今過今早恒指高開後回調,回補即日裂口,午市升幅較開市大大收窄。

恒指高開231點,報26571點,盤中曾升443點,見26782點半日高位,創逾四個月高位。高位有獲利沽盤,一度拖累指數倒跌143點,見26195點半日低位,但仍守250日線後回升。中午恒指報升32點,報26371點;國指則報收10758點,同樣升32點。

內地股市咁強勁,全靠呢期人仔回勇,人民幣兌美元離岸價(CNH)一度升穿7算大關,不過目前都係去番七算水平。不過人民幣擺脫弱勢,令內地股市牛氣再現,最先受惠就係內險股,尤其係投資A股最重嘅國壽(02628),噚日勁升逾一成後,今日再升至21.15元半日高位,中午收升幅收窄至不足5%,但能夠企穩20元樓上,要重返年初高位22元水平應無難度。

至於另一個受惠A股做好嘅板塊內地券商股,早兩日勁升後,今日受招商證券(06099)供股計劃消息拖累,高開低走,招商跌幅較大半日跌7.1%,其他內地券商股均見回吐,阿Man推介嘅中信証券(06030)半日僅跌1%已算較為硬淨。不過券商股升勢過急,有回調都係好事,只要A股持續向上,內地券商股抖抖氣又可以重新出發。

另一個表現較標青係物管股,龍頭碧桂園服務(06098)獲大行調升目標價,半日勁升12%,其他物管股跟升,普遍升幅超過2%。不過物管股估值唔平,再追入上升空間有限,喺現水平值博率麻麻。

反而新經濟股噚日調整後,今日大部分又生猛番,騰訊(00700)跟阿里巴巴(09988)齊齊創新高,ATMX成員只有美團(03690)再回吐,但早段貼近10日線附近,即180元左右又見支持,10日線入場博短炒無乜死錯人。其他新經濟股長炒長有,上周五阿Man推介批股後唔死嘅維亞生物(01873),今早重上9元樓上,大有條件再上破10元,首個目標先睇12元,呢啲位追入,穿8.5元止蝕。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads