熱門:

2020年6月29日 即巿股評 港股直擊

【盤房來料】大市維持上落格局 炒股唔炒市屬主旋律

美股上周五顯著下跌,美國疫情喺經濟重啟後,再爆發第二波,無論確診數及死亡人數均見上升,搞到唔少州份重啟進程反要倒退亦混亂,加上亦無其他好消息帶動,引起投資者恐慌。經濟復甦未似預期,加上本周有多項政經因素左右大市,預計呢個星期港股走勢將會更為波動。

恒指高開77點,報24627點已經係半日高位,外圍股市偏軟,港股亦隨之向下,半日最多跌400點,低見24149點,更明顯跌穿10日(24462點)及20日(24473點)線。午收市亦接近低位,恒指報收24159點,跌390點;國企指數報收9711點,跌141點。

重磅藍籌股普遍受壓,強如騰訊(00700)早段高見493.8元後亦掉頭,倒跌0.37%,報收483.2元。大笨象(00005)弱者愈弱,半日跌近2%,半日報收36元,又再逼近3月份低位35元。港版國安法通過在即,有人話立法後可保香港經濟穩定繁榮,阿Man唔敢駁嘴,皆因港股一直有無形之手維穩,但係大笨象已走晒樣,而另一重磅金融股友邦(01299)半日更跌3.6%,留意70元不容有失,一失守呢個反彈浪打回原形。港交所(00388)回吐,重返320元之下,有心買貨不如再等等。

阿Man就一直睇唔好本地地產股,雖然近日新盤銷售成績理想,但唔代表地產股有運行,今日呢個板塊更普遍跌超過2%,太古A(00019)更急跌5%,係表現最差成份股。一直係好息之徒愛股嘅領展(00823)更連跌七個交易日。

有消息指中證監有意向內地銀行發放券商牌照,上星期熱炒嘅內地券商股今日顯著下跌,大部份券商股輕則跌0.5%,重則跌近6%。阿Man上周都講過大市炒到券商股都有啲水尾,而券商股亦難捉摸,隨時炒炒下無咗影,高追好易中伏。話口未完,今日呢個板塊走晒樣之餘,大市亦回軟。

內地太陽能發電競價項目總規模遠超預期,光伏股份獲資金追捧,信義光能(00968)跟福萊特玻璃(06865)創新高,中午分別升1.9%及3.2%。不過兩股都出咗長針,咁長條影線喺上面,信義光能更出埋陰燭,又係無得高追嘅股份。
期指今日結算日下跌,走勢轉弱,不過預期現貨喺二萬四有不俗支持,除非美股繼續急挫,否則港股將維持上落市格局,暫時支持位係23800至24000點,上面阻力都係100日線即24700至25000點附近。繼續炒股唔炒市,資金繼續追捧科技股及藥業股,呢兩個板塊股份可以趁回吐吸納。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads