承如噚日喺[下半part]所指，呢期恒指開出裂口後就以橫行走勢直至完場，故若打算以過夜部署嘅話，可嘗試喺臨收市前開恒指5分鐘圖，睇返條SlowSTC(14,3)嘅走向。基於STC唔似走勢圖咁會出現裂口，所以如臨收市前SlowSTC(14,3)係處於超買位置嘅話，則翌日博下行嘅機會較高；相反亦然。
睇返恒指5分鐘圖，其實噚日由下晝2點50分至完場時，SlowSTC(14,3)都係處於超賣水平。至今朝恒指微升19點開市，報24344點，開市後恒指雖一度見下行，唯其後再度發力向上，至依家9點55分見SlowSTC(14,3)已重上超買位置，可以話係噚日嘅超賣埋咗今日出現鐘擺嘅伏線。
依家9點57分，日線圖上恒指仍處於10天線(24533點)同20天線(24017點)/50天線(24067點)之間；換保歷加通道出嚟睇嘅話可能會比較好啲，事關目前處於保歷加上升通道，且靠近保歷加通道中軸位置，同步見SlowSTC(14,3)，%K線下行走勢明顯煞停，而%D線亦開始見煞停跡象，兩線目前均處於中軸水平，數值上%K線尚未升穿%D線，不過若恒指繼續造好，兩線回落到中軸再度回升嘅可能性仍然存在。
睇埋恒指牛熊證街貨圖。牛證街貨方面，如噚日估計一樣，有唔少街貨都係0，皆因呢幾層裡面確實係無牛證嘅存在，而最貼價嘅24200至24299點，就只得62張期指，都真係相當之比面。
至於熊證方面，最貼價街貨層仍然為24500至24599點，呢度有相當於174張期指。而噚日估計重貨區可能喺24700至至24799點，甚至喺25000至25099點。今日見似乎首站相對較多街貨層為24800至24899點，有相當於353張期指，至於25000至25099點亦都有329張期指，以近熊街貨嚟講，呢層係屬於第二多街貨層數。
計計牛熊街貨中間位：(24500+24299)/2=24399.5點，按目前10點7分恒指做緊24350點計，現價同中間位只係相差49.5點；又咁講，先唔理牛熊街貨有所多(街貨有得儲嘛)，牛熊兩者最貼價層嘅差距只係得201點，真係不消兩個會回就到，見住恒指開市到依家嘅走勢除咗今朝un咗兩嘢之後，又開始想橫行至收市，怕且都係想兩邊儲多啲街貨先至郁手。
八掛下恒指波幅指數(VHSI)，此前恒指動輒郁700幾點，早一步諗到睇VHSI就應該估得到，依家再望只見到VHSI嘅SlowSTC(14,3)兩線上到中軸之後就有下行跡象，即暗示未來一段時間恒指嘅波幅情況接近彌留狀態，都係企喺一邊算。
作者阿珊，任財經/投資版傳媒人十幾年，《鐘擺戰略贏港股》作者。用技術分析專心玩輪證，唔貪心，志在搵餐下午茶。
電郵：[email protected]；FB：輪證贏家
