熱門:

2020年5月27日 即巿股評 港股直擊

【盤房來料】外資動向未明 北水努力維穩

全球經濟逐步重啟,市場同時憧憬疫苗開發將取得突破成果,美股周二假後復市表現理想,道指升逾2%,標指更一度重上3000大關。不過港股就跟唔上,夜期跟ADR腳軟,今日恒指則高開低走。

恒指高開130點後,報23515點已經係半日高位,開市即高開低走,一度跌至23157點半日低位,其後跌幅收窄,暫時喺23300水平爭持。中午恒指報收23294點,跌90點;國指中午跌29點,報收9566點。

由於今日立法會將二讀國歌法,有網民發起圍堵立法會,警方嚴陣以待,全城佈防,暫未知結果如何。加上明日人大將表決國安法,由上周兩會開幕時表示引入港版國安法後,已引起國際關注,加上侵侵已表明一旦香港落實國安法,將會強烈回應,今日更加表示最快呢兩日有回應,市場最擔心係美國制裁下,香港或失去獨立關稅區地位。

預期喺政治因素影響下,缸邊友普遍審慎,大市噚日反彈,但23500點阻力實在係大,今日港股又回復走軟。自上周四起港匯出現較大幅波動,尤其遠期港元更有投資者狙擊,押注港元喺稍後時間大幅貶值,遠期港匯較即期港匯差距拉闊至600點子。

不過喺中概股排住隊回歸港股上市,同埋其他中資新經濟股未來將會取港捨美,選擇喺香港上市,將令資金流入參與新股集資活動,有助抵銷外資流走嘅影響。咁嘅情況之下,令到港股喺上周五急挫後有一定支持,暫時仍能守於23000水平之上。

除咗新股集資活動令資金停留之外,北水一直積極護航,維穩無形之手從未有離開港股,阿Man認為阿爺為咗證明立法後比未立法好,將會不顧一切利用北水維穩。但外資點睇立法後嘅香港又係另一回事,估計北水同外資將會嚟一場角力,咁就會形成港股唔上唔落嘅局面,缸邊友都係用番炒股唔炒市呢個策略方為上策。

不過最當炒而又一直跑贏大市嘅新經濟股今日沽壓較大,暫時係淡友佔上風,大部份科網股今日普遍下跌2%以上。而ATM三隻龍頭今日亦走軟,但又未至於跌至好吸引水平,阿Man認為長線睇好想買貨,都係分段買入,仲要好好控制注碼。畢竟港版國安法實施後,未知外資反應如何,假如侵侵短期內出招應對,定必對市場帶嚟震盪,再強嘅新經濟股,喺累積巨大升幅下,難免成為沽貨套現對象。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads