熱門:

2020年5月18日 即巿股評 港股直擊

【盤房來料】有意買騰訊唔使急可分段收集

美國升級對華為嘅出口限制,中美關係再陷入冰河時期,中美雙方舌劍唇槍,不過美國就先發制人,未知中方有何反制措施,但可以預期呢段時間,中美關係將會持續困擾大市。

恒指低開60點,報23736點,一度跌23722點見半日低位,其後大市回升,恒指半日高位23952點,暫時受制於10日(24076點)、20日(24104點)及50日線(23966點)滙聚區。半日恒指報收23892點,升94點;國指則升35點,報收9709點。

騰訊(00700)業績後見多間大行不約而同調高其目標價,睇番咁多個券商嘅平均目標價約為500元。不過騰訊公布業後股價高開低走,回咗兩日之後,今日似乎喺420元見支持,剛好亦係10日線之所在,並未有再向下回補5月11日嘅上升裂口。不過有心買騰訊作長線投資,唔使一次過衝鋒,可以分段買入,始終騰訊目前處於年內高位,一旦市況有乜風吹草動,呢隻火車頭必定受到衝擊。加上《王者榮耀》未成年戶限日玩1.5小時,而且課金同樣受到限制,未知對騰訊影響有幾大,幾時都係保守些少穩陣。

其他重磅股個別發展,之前阿Man建議趁港交所(00388)出完業績股價回落上車,其後港交所股價逐步回升,目前已重返業績前水平,有趁回吐撈貨嘅,可以坐定定等260元目標,短炒用番252元作止賺。

美國擴大對華為制裁,手機設備股今日腳軟,舜宇(02382)半日跌一成,係跌幅最大藍籌股,而多間大行齊齊降瑞聲(02018)目標價及投資評級,瑞聲上周五升一日咁大把,弱勢股就係弱勢股,千祈咪畀一日半日回升誘惑到。

相反5G設備股今日起動,三大中資電訊商喺2020年世界電信和信息社會日大會上披露5G規劃,表示年底前或完成建設55萬個基站。之前阿Man推介嘅京信通信(02342)終於起動,半日升6.6%。不過美國針對華為,令市場擔心曾被制裁嘅中興(00763)再度成為目標,中興半日跌1.3%,既然受到不明朗因素困擾,暫時中興都係看眼手勿動。

醫藥及生物科技股繼續熱炒,市場對相關股份熱情未有冷卻,唔少股份今日再創新高。對於相關B股,老實講阿Man唔多識睇,炒作呢類股份要嚴守止蝕,始終公司未有盈利蝕緊錢,一旦炒作資金離場,累計升幅愈大嘅股份,可能跌得愈甘。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads