熱門:

2020年5月15日 即巿股評 港股直擊

【盤房來料】金礦股現價再追值博率大減

隔晚美股玩咗轉過山車,開市承接之前三日跌勢繼續走弱,加上侵侵仲威脅切斷中美貿易所有關係,又話呢期唔會同佢「好朋友」習大大講電話,搞到道指一度跌穿23000點。不過侵侵已經好多日話要追究中國,又話要大懲罰咁咁咁,講得多市場都當佢吹水,狠來了講得多,大家都開始無反應。其後金融類別股份傳出併購消息,美股拗腰轉跌為升,三大指數做好,扭轉三日跌勢。

今早港股表現比較反覆,雖然美股急升,但內地今早公布4月份經濟數據表現差參,令港股無所適從。恒指高開4點,曾升至23936點半日高位,但內地數據公布後,大市掉頭向下,一度跌158點,見23671點半日低位,亦係5月4日以嚟新低。不過阿Man話咗個市只係反覆上落格局,大市去到呢啲位又見買盤出嚟撈貨,恒指止跌回升。中午恒指報收23925點,升95點;國指則報收9717點,半日升30點。

友邦(01299)公布首季業績,新增業務價值按年跌近三成,半日先跌後回升,半日升1.9%都算係咁,不過股價一日唔重上70元水平樓上,仍未能扭轉弱勢。騰訊(00700)今日除淨後,股價仍升0.8%,股價噚日出完枝大陰燭,睇怕都要整固抖抖,不過業績後大行相繼調高其目標價,長線有貨嘅無謂走嚟走去,繼續坐定定。

瑞聲(02018)中午公布首季業績,但未派成績表前上半場股價升逾8%,中午業績公布首季盈利跌88%,未知下半場回否有回吐。不過瑞聲業績麻麻都預咗,相對其他手機設備股好似舜宇(02382)咁,瑞聲係落後得可憐,有資金追落後都好正常。

IPO凍資王沛嘉醫療(09996)首日掛牌,股價半日勁升七成,不過股價高開後基本上係橫行,除非抽中新股,否則今早先嚟買貨冇乜着數。由於沛嘉表現強勁,帶動多隻同樣無收入嘅生物科技B股落鑊,唔少B股再創新高。而早幾日阿Man推介嘅維亞生物(01873)噚日抖一抖又嚟料,半日再升一成,已接近第二目標價6.5元,如果仲有貨喺手可以用6元做止賺價持有。另一阿Man一直睇好有機會變身藍籌嘅重磅醫藥股翰森製藥(03692)亦創新高,雖然之前表現較為呆滯,但以其巨無霸晒士,未來有加入成份股機會,又一次證明,價值只會遲到,從來不會缺席。

唔少粉絲問阿Man點睇黃金,其實由去年開始,阿Man一直睇好金價走勢,金礦股同黃金ETF亦曾作推介,呢類股份都係跟隨金價上落,暫時金價仍然係1650至1750美元水平上落,而隔晚金價重上1730美元水平,已逼近上落區間頂部,除非金價能進一步突破1750美元,否則呢啲水平再追相關股份,值博率已大減。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads