熱門:

2020年5月12日 即巿股評 港股直擊

【盤房來料】指數千點上落 集中炒股唔炒市

美股隔晚個別發展,侵侵之前威脅要追究中國有關疫情隱瞞問題,可能再向中國重徵關稅,中國亦不甘示弱,表示可索性推翻原先貿易協議,即係所有談判又歸零?要重新開始?內地今早公布通脹數據差過預期,港股兩日升咗超過六百點之後,今日嘔番四百幾點出嚟。

恒指低開244點後,曾見24411點半日高位,其後跌幅一度擴大至465點,見半日低位24136點。中午恒指報收24163點,跌438點;國指則報9821點,跌169點。目前恒指處於10、20及50日線滙聚區,暫時喺呢個水平爭持,主要受內地股市偏軟所拖累。

重磅藍籌股普遍回吐,友邦(01299)及大笨象(00005)齊齊跌逾2%,兩股已拖低恒指逾百點,大笨象40元一路企唔穩,短線走勢仍然偏弱。至於周三派成績表嘅騰訊(00700),今日亦回吐1.8%,半日報收428元,不過升咗咁多,仲要又係業績前先炒起,小心公布完業績打回原形,暫時睇位420元個位,唔穿問題都晤大。

港交所(00388)半日靠穩,仍然企喺250元樓上,上星期阿Man叫趁出咗業績回吐喺245元上車,大家有跟又可以坐定定。市傳京東最快月底招股,集資額高達265億元,將會係今年首集回歸嘅中概股,預期中概股回歸陸續有嚟,港交所呢門獨市生意邊冇得輸。

港府及新成立組織「香港再出發大聯盟」呼籲地產商減租,地產股及收租股下跌,整個板塊下跌,跌幅由1.4%至3.2%不等,除咗友邦同大笨象,地產股係拖累港股今日走軟嘅重災區。

內地放寬隔離限制,陸續復工復課,中國教育部表示,目前已有近四成學生復課,教育股逆市做好。之前阿Man喺四月底向粉絲推介嘅天立教育(01773),指其估值平可追上,呢幾日表現唔錯,今早盤中更創新高。其他教育股亦大部份做好。

吼買維亞生物

醫藥股亦表現突出,尤其生物藥業股,阿Man今日吼位維亞生物(01873),走勢突破已逼近3月高位5.06元,今日喺成交配合下,相信再破頂創新高問題不大。之前有報告目標價6.75元,阿Man保守啲先睇6元,現價上車都仲有兩成上升空間。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads