歐美疫情漸見緩和，而香港呢邊更於上周三度出現零確診，市場憧憬經濟重啟漸回復正常，美股上周五做好，三大指數上升。雖然上周有消息指金正恩病重，更有傳聞指其接受心臟血管手術後陷入昏迷，甚至已因腦幹死亡變成植物人，不過周末期間北韓官媒報道金正恩感謝三池淵建設人員，間接反駁其病重傳聞，亞太區股市普遍向上。
恒指高開199點，重上二萬四大關，其後反覆向上，成功收復10日線(24100點)並未有停落嚟，半日大市最多升432點，見半日高位24263點，創自4月20日以嚟高位。恒指中午報收24221點，升390點；國指則升198點，半日報收9854點。不過可能長假期將至，再加上明日期指結算，缸邊友都傾向保守，半日成交額縮水至426億元，相信嚟緊兩日港股交投會更趨淡靜。
重磅股今日以內銀股表現較皆佳，內銀股龍頭均錄得超過2%升幅。其實中行(03988)剛剛先見旗下金融投資產品原油寶爆咗鑊，客戶唔單止因為上周歷史性油價見負數而錄得巨額損失，部份客戶更未能依時繳付保證金，有消息指相關虧損達百億元，而中行暫未向客戶追繳相關保證金。無論係原油掛鈎產品，抑或其他金融產品都好，今次原油期貨爆煲，唔知會衍生幾多問題，而相關產品發行機構會否受影響，暫時仲係未知數。阿Man提提大家咪見內銀股彈一彈又心思思想追貨，今年將會係金融股，尤其內銀股難捱嘅一年，無論內銀或本地銀行股都好，暫時都係避之則吉。
上周五阿Man講過醫藥股呢期以生化科技醫物股最能吸引資金，今日相關股份繼續上升，呢個板塊嘅股份閒閒地升超過3%，不過值得注意係醫藥股中嘅B股，即係指呢批股份有收入，但無盈利，公司仍然蝕緊錢，炒炒賣賣當然唔係問題。有心長持坐貨，真係要好好分析，唔係一窩蜂人買自己又要買。
香港疫情有受控跡象，一周內三次零確診，帶動本地地產及消費股做好，一般本地地主股升超過1%，更有大行報告指本地地產股最壞時候已經過去，股價喺累計跌咗唔少之下，現價已變得合理，可分段吸納。至於內房股則憧憬兩會或推出利好政策支持樓市，內房股曾遍錄得3%之上升幅。
由於呢個星期得返三個交易日，明日又到期指結算，資金除咗集中炒個別板塊之外，市況或於24000水平附近結算。
麥狄文
(徐狄怡‧證監會持牌人)
