熱門:

2020年4月20日 即巿股評 港股直擊

【盤房來料】新經濟股 輕資產股 放心坐落去

上周五美股全線做好,雖然道指期貨喺亞洲時段早段下跌,但其後轉跌為升,加上內地降LPR利率合符預期,港股今早高開後靠穩。恒指高開123點,見過半日高位24503點後回軟,一度倒跌154點,見24225點半日低位,其後再反覆回升逾百點,但升幅至中午收窄。恒指中午報收24419點,升39點;國指則升50點,半日報收9865點。

上半場港股其實都幾悶,半日成交額縮水至不足500億元,睇嚟缸邊友喺大市累計反彈咗咁多之後,現水平唔多積極入市,加上下星期期指結算同埋長周末假期,咁嘅時間難免會保守啲。

重磅藍籌股個別發展,已升越400元大關嘅騰訊(00700)開始要抖抖,半日微升0.1%,睇嚟要喺現水平整固,留意405元南非股東減持價守唔守,守得住南非價,反映呢個位嘅沽壓,經過年幾時間已完全消化,騰訊順利擺脫陰影,可望強勢重現。

油價跌到一仆一碌,上周有傳聞指新加坡油企興隆隱瞞8億美元期貨交易損失,而大笨象(00005)為其最大債主,大笨象上周連跌三個交易日後,今日終見反彈,暫時再度重返40元水平。雖然油價狂插,三星原油期貨(03175)半日跌6.7%,反而三桶油唔跟油價跌而上升,你話幾咁難捉摸。之前阿Man講過賭油價上升寧願買三星原油期貨,主要係較貼近油價走勢,不過阿Man再重申,本人並唔睇好油價表現,即使OPEC+已達成減產協議,喺供過於求下,油價今年都係死死吓,最多係有波幅,冇升幅,就算超賣後反彈,表現仍然會反覆。

再有消息指治療武漢肺炎疫苖有進展,而快速測試劑亦不斷有新供應獲得認可,令資金再度流入醫藥股。今早再有醫藥股創新高,而中生製藥(01177)半日升4%,係表現最好藍籌股。阿Man一直都撐醫藥股,即使去年板塊受帶量採購政策拖累,阿Man仍建議逢吸納可吼龍頭股,事實上喺人口老化及民眾對高質藥品需求增加嘅情況下,醫藥股前景仍然睇好一。

阿Man呢期講嚟講去兩個板塊缺一不可,一個係新經濟股,另一個係輕資產股。之前推介嘅平安好醫生(01833)已升抵紅底股水平,只差幾時可企穩呢個水平。至於物管股係輕資產股代表,多股喺上月大市回調時仍逆市走強,甚至創新高,呢個上升勢頭仍未改變,物管股可以放心坐落去。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads