熱門:

2020年4月6日 即巿股評 港股直擊

【盤房來料】大笨象血肉長城護盤股東未見家鄉

雖然油組嘅視像會議推遲至周四舉行,但有得傾都好過冇得傾,油價戰有望終止,即使油價因為會議推遲而下跌,不過股市就醒神。美股期指急彈逾3%,扭轉上周五跌勢,港股今早有運行,反彈重上10日線並升穿20日線,暫時企穩喺兩線滙聚區之上。

內地股市假期休市,港股唔需要咁多顧忌,恒指高開322點,見過23558點半日高位後,一度升幅收窄至35點,見23271點半日低位,亦剛好係10日及20日線滙聚區見支持,其後重拾升勢。中午恒指報收23493點,升257點;國指中午報收9554點,升63點。

已連跌七個交易日嘅大笨象(00005)今日終見反彈,半日彈2.2%,報收38.7元,可惜當日喺40元築起血肉長城護盤嘅忠粉,今日仍未見家鄉。大笨象彈弓手,話派息又唔派,令小股東傷心欲絕,絕交嗰個絕,估計分手後唔會咁快入返場,睇嚟40元呢個支持位或變成阻力,要博反彈大笨象並唔係乜嘢好選擇。

科網股普遍做好,上周阿Man推介嘅平安好醫生(01833)升到唔識停,75元短線目標超額再超額完成,家陣連80元亦升破並創上市新高,進入無障礙通道,有貨喺手只要睇住走勢圖,一日唔轉陰燭都唔使急住食糊。至於另一醫網股阿里健康(00241) 順利升穿14元急起直追,先睇16元前高位,呢隻唔少大行睇好,目標價都廿皮樓上,阿Man唔貪心,先平前高位再講創新高。龍頭騰訊(00700)呢幾日反而漉咗少少,380元未企穩,但守得住喺375元樓上,仍有條件繼續向385元推進。

除咗科網股,電訊股及5G概念股今日表現亦唔曳,聯通(00762)跟中電信(00728)合作,兩股亦拍住上,齊齊升逾3%。至於上周四曾爆上嘅中移動(00941)半日再升1.6%,不過剛好升至100日線附近,唔排除呢啲水平要抖抖。5G股以京信(02342)表現較佳,半日升8%,走勢突破再展升浪,暫時睇住3.5元個位,升穿梗係貪心啲睇4元樓上,希望重返十年前高位。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads