熱門:

2020年4月2日 即巿股評 港股直擊

【盤房來料】大笨象仆直唔排除資金換馬至新經濟股

美國嗰邊疫情未受控,每日新增確診個案同死亡個案仲係上升緊,侵侵仲警告未來兩周將非常、非常咁痛苦,用到兩次非常,都應該真係好大鑊,加上白宮亦警告今次如果唔做好抗疫工作,將會死得人多,死於肺炎嘅病者人數或者高達10萬至24萬,都咪話唔嚇人。雖然唔知白宫同侵侵係嚇鬼,定係做定expectation management,不過咁樣講一講,美股隔晚又腳軟,三大指數齊跌逾4%,港股隔晚ADR同夜期都碌咗落去,今朝港股預咗佢低開。

恒指低開247點報22838點,最多跌329點見半日低位22756點,其後喘定,加上道指期貨回升逾300點,恒指逐步收復失地,更一度倒升72點,見半日高位23158點。恒指中午報收23065點,跌20點,10日線失而復得;國指半日倒升17點,報收9422點。

講咗幾次個市唔好睇得咁淡,因為疫情終有過去一日,喺各國央行狂印銀紙嘅時候,銀紙變得唔值錢,侷買資產係硬道理,今日個市就反映咗呢一點。喺大笨象(00005)再跌3%,創逾11年新低之際,眼見新經濟股逆市走勢,唔排除有資金從大笨象流走,換馬去新經濟股,不過今日最威就唔係ATM,反而係上周阿Man喺某直播節目推介嘅平安好醫生(01833)同阿里健康(00241)呢對綫上醫療孖寶。話咗新經濟股靠得住,平安好醫生已順利升抵目標75元,今日再下一城半日再升逾7%,逼近80元,目前策略係以75元作止賺,一日唔轉陰燭都可以放心持貨。至於阿里健康升至14元如能企穩,如無意外可向前高位16元水平推進。

除咗新經濟股之外,輕資產股呢年幾兩年都係基金寵兒,物管股繼續尋頂,講真阿Man幾愛呢個板塊都好,始終都畏高,尤其物管股現價估值真係唔平,有貨坐住梗冇問題,冇貨都係等回調低吸,高追勇氣欠奉。

傳聞沽空機構盯上河北建設

講完啲令人振奮嘅好股,阿Man想同大家爆單料,話說今早有線人來料,話睇住河北建設(01727)小心隨時插水,阿Man就話好嘢先拎嚟講,衰嘢提嚟做乜鬼。不過線人話此股唔單止PE貴過其他同業,派息又縮水之外,最大問題係公司嘅累積沽空愈嚟愈多,似乎係被沽空機構盯上眼。自從公司2月底發盈警以後,沽空愈見愈多,最近聽聞有人借咗愈千萬股沽空,唔排除不久將來會有相關沽空報告面世。雖然河北建設較為冷門,缸邊友都未必有貨,但既然線人言之鑿鑿,咁就提一提大家,有貨好嗱嗱車跳車,無貨咪食住花生睇下遲啲有冇花式跳水表演囉。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads