熱門:

2020年3月12日 即巿股評 港股直擊

【盤房來料】二萬四止跌 反彈亦難越孤島

等到頸都長,疫情已經全球爆到七彩,世衛終於宣布武漢肺炎為全球大流行,係終於,後知後覺嘅世衛,早已失去公信力。喺全球大流行之際,香港暫時確診個案仍唔算高,並唔係政府防疫做得好,多得香港人自己防疫意識高,經過沙士一疫,喺1月底內地爆發疫情之時,內地口口聲聲話疫情受控,香港人已高度戒備,幾乎全城戴住口罩保護自己,當全世界笑緊香港人搶防疫物資之際,疫情已悄悄喺全球爆發,香港人呢次係自救,若然唔靠自己,恐怕確診數字會成千上萬。

美股同樣後知後覺,但呢兩個星期一追上嚟,跌幅可以話非同小可,一下子就已較高位跌超過兩成,陷入技術性熊市。雖然跌市期間美股大落後仍見大彈,每次反彈就係靠市場憧憬白宮出招救市,而世衛宣布疫情大流行,美股隔晚再急挫,可惜侵侵今早就對應疫情發表全國講話,市場似乎唔再憧憬,係因為失望,道指期貨今早再挫逾千點後跌幅收窄,港股當然受拖累。

恒指低開573點見24657點,已屬半日高位,其後跌勢進一步加深,最多跌1113點,見24117點半日低位,同時創2017年4月24日以嚟新低,幸而二萬四關總算守住,跌幅略為收窄。恒指中午報收24269點,跌962點;國指則失守一萬大關,中午報收9687點,跌383點。整體大市股份超過九成下跌,只有8%股份上升。

藍籌股全線下跌,友邦(01299)表示料首季業務受疫情影響,其實又何止首季業務受影響,睇怕上半年業績唔會有運行,尤其係新增業務部份最受重擊,友邦股價穿100周線後,再失守72元,下一個較具力度支持位喺60元,斷估無咁容易失守。至於另一隻重創權重股當然係大笨象(00005),全球央行減息已成大趨勢,恐怕係減遲半步都擔心經濟陷入水深火熱之中,大笨象喺低息環境下,除咗面對息差收窄,貸款質素難免下降,公司到目前為止仍群龍無首,股價當然受壓,唔知今次有冇機會見番2008年海嘯價,即係閃跌至40元樓下。除咗大笨象,所有銀行股面對息差收窄壓力,全部跌到一仆一碌。

沙地要打原油價格戰,紐約期油急跌超過5%,三桶油被狠沽,果然前日只係死貓彈,面對產油國增產,市場需求下跌,石油股同油服務凶多吉少。騰訊(00700)半日亦跌逾4%,其他新經濟股亦難逃一跌。

不過阿Man認為喺幾日之間,港股兩度跌逾千點,短線喺二萬四水平應該頂得住,早兩日多次提醒大市唔上番25500點都冇運行,唔使兩日就應驗咗再度穿底,至於慘係技術走勢上,日線圖喺25000至25500點形成咗個孤島,即係話就算大市喺二萬四喘穩反彈,喺25000至25500有極大阻力,要上番去孤島之上難上加難,望就望二萬四守得住,否則大市再跌超過一千點,見二萬三樓下亦有可能。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads