熱門:

2020年3月6日 即巿股評 港股直擊

【盤房來料】醫藥股成疫情市資金出路

噚日啱啱先講完,美國咁樣忽然咁升唔係好事,果然係暴漲之後,隔晚又急挫,雖未有抹去周三晚所有升幅,但三大指數挫逾3%,鐘擺效應呢下發揮得淋漓盡致,三大指數就如鐘擺一樣兩邊搖,未知幾時識得停。

美股隔晚急跌,原因係美國投資者擔心當地武漢肺炎疫倩會擴大,資金再度湧往債市避險,10年美債息再創新低,仍然在1%水平之下。隔晚港股喺夜期跟ADR都見腳軟,今早低開後持續偏軟。

藍籌重磅股當然難以倖免,騰訊(00700)、友邦(01299)、平保(02318)跟大笨象(00005)四大天王,全部捱沽跌逾2%,大市自然亦跌足2%。早兩日聯儲局突然宣布減息半厘,已經震動市場,預示美國經濟或將陷入水深火熱之中,而利率期貨顯示,聯儲局於3月18日嘅議息會議,再減息半厘嘅機會高達百分之百,銀行股亦捱沽。除咗大笨象之外,恒生(00011)跟中銀香港(02388)亦分別跌1.9%及2.3%。內銀股亦無好日子過,閒閒地跌1.5%或以上。

話咗呢期醫藥股會繼續跑贏,市況再弱資金亦得搵出路,而醫藥股就係疫情中嘅資金出路。阿Man一直睇好翰森製藥(03692),表示呢隻重量級藥股,未來極有機會被納入為藍籌股,而翰森亦不負所望,今日再創上市後新高。另一阿Man時有推介嘅藥股中生製藥(01177),今日升破12.5元,走勢上算係突破一直以嚟10.5元至12.5元嘅上落區間,只要股價能守穩於12.5元之上,有條件向14元挑戰。其他醫藥股表現都唔錯,呢個板塊估計今年應可持續跑贏大市。

內房股今日有啲腳軟,雖然人民幣變動不大,但克而瑞研究中心報告稱,受疫情以及季節性因素影響,2月內房銷售創近幾年單月新低,百強房企銷售額僅3243.3億元人民幣,按月跌43.8%,按年降37.9%。板塊今早捱沽。不過內地持續放水係事實,只要人民幣生生性性,內房股跌一跌,隨時又會彈番上去,有貨唔需要太擔心。

噚日阿Man講過,大市要扭轉弱勢,定必要重上26700水平並企穩,誰知10日線得而復失,一日都未能守得住,即係話港股維持弱勢,目前仍然喺25800至26800水平之間上落,下面最高守得住25800,否則恐怕大市或隨外圍股市震盪向下再尋找支持。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads