有外電報道指G7財長將於今日舉行緊急電話會議,研究採取措施,防止武漢肺炎疫情嚴重打擊全球經濟,市場憧憬環球央行齊齊放水救市,隔晚美股興奮回應,道指更創最大點數單日升幅,港股亦跟隨反彈,不過力度就相差得遠。
恒指高開127點後,升幅一度擴大至236點,見過26527點半日高位,只不過市場唔願高位追貨,令升幅收窄至65點,見半日低位26357點,但又唔多肯再落。而大市就喺26500點附近反覆。恒指半日升204點,報收26495點;國指則升90點,半日報收10575點。
騰訊(00700)又係大市火車頭,半日升逾2%,暫時仍然未重返400元之上,至於連日有北水流入嘅建行(00939)半日升0.6%,其他重磅藍籌股普遍向上。只係大笨象(00005)力水一般,連跌十個交易日後早段反彈後無以為繼,半日無起跌,友邦(01299)半日仍要微跌0.1%。兩隻國際金融股嘅表現,反映市場對全球經濟表現仍欠信心。
話咗新經濟股同科技股反彈力度會較其他股份強,而事實亦如此,而今日軟年股更繼續受捧。除咗軟件股,線上醫療及保險股表現出色,之前阿Man有推介嘅阿里健康(00241)創新高,平安好醫生(01833)逼近80元,大有條件創新高,而眾安在線(06060)亦升近36元,可向40元挑戰。內地有報道指三大電訊商將開始5G第二期招標,料4月份可啟動,5G概念股以京信通信(02342)半日升逾5%最勁,有貨唔怕繼續持有,追貨留意短期需守3.2元。
醫藥股喺疫情爆發以嚟一直跑贏其他板塊,尤其公司有藥物對治療武漢肺炎有效,又或有份參與疫苗研究嘅公司,持續有資金流入。今日兩龍頭中生製藥(01177)及石藥(01093)分別升4.4%及3.6%,其他醫藥股普遍升2%以上。阿Man一直建議呢個板塊可趁回調吸納,預期今年可持續跑贏大市。
雖然今日港股係隨外圍反彈,不過力度方面只係一般,始終央行減息救市嘅原因係經濟下滑,若然疫情持續,經濟下滑無可避免,亦無法預測疫情對全經濟實際影響有幾嚴重。預期港股走勢仍反覆,反彈阻力係26800至27000點,再睇睇牛熊證重貨分布,牛證街貨數目仍遠超熊證街貨,只要外圍稍有差池,港股隨時再掉頭向下殺牛。
麥狄文
(徐狄怡‧證監會持牌人)