熱門:

2020年2月21日 即巿股評 港股直擊

【盤房來料】賭場重開無客一樣拍烏蠅

美股隔晚回吐,由於美滙指數逼近100大關,導致亞太區多國貨幣疲弱,資金除流向美元之外,同時流向黃金,反映避險情緒升溫,資金從股市流出,美股又高處不勝寒,再強亦難免受壓。至於港股隔晚ADR跟夜期已跟隨美股下跌,港股所謂跟隨美股嘅步伐,就係跟跌唔跟升,人哋美股向上,港股就高開低走,人哋美股向下呢,港股就低開兼低走,完全高下立見。

恒指低開158點,早段跌幅一度收窄至124點,見過27484點半日高位,其後沽壓再現,一度跌穿20日線(27342點),其後最多跌344點,見過27264點半日低位,創自2月10日以嚟新低,但守到條100日線(27209點)。其後A股向上,港股跌幅再度收窄,中午恒指報收27408點,跌200點;國指報收10825點,跌88點。

藍籌股普遍向下,騰訊(00700)呢個火車頭,半日跌1.2%,不過半日收405元,都仲守到個南非價,留意400元真係唔好失守,否則有進一步下行壓力,到時連個市都要齊齊下試二萬七。至於剛派成績表嘅平保(02318),業績除咗新增業務價值叫見得吓人,整體業務遜預期,股價半日跌0.7%。其他重磅股都見腳軟,反而大笨象(00005)落到56元水平叫喘穩,有啲支持。

濠賭股已於噚日恢復賭場營業,不過星期二阿Man喺另一平台做直播時講咗,賭場重開唔等於一定有生意,家下大家防疫意識強,只有啲視死如歸嘅爛賭鬼先會冒險入賭場,身嬌肉貴嘅高端客戶,未必會喺呢啲時候搵命博,賭場重開一樣拍烏蠅。加上多間大行大幅調低今年賭收預測,今年濠賭股都難捱,今日濠賭股仲係要跌,呢個板塊短期內避之則吉。

雖然商務部昨日稱,正研究政策措施,進一步穩定汽車消費,但消息未對汽車股有太大沖喜,雖然個別汽車股逆市上升,不過升幅都唔算勁,只可視為反彈。

反而噚日阿Man提到金價成功突破1600元水平,只要企穩1620元之上,要上1650至1700有望,金礦股及黃金ETF做好,估計金價向好下,相關股份易升難跌。

嚟到星期五,港股下半場照計唔會太大變化,不過牛證重貨區殺到七七八八,會唔會再向下食埋27000至27200嗰塊牛扒都係五十五十,嚟緊睇住條100日線,若然失守必考驗二萬七大關,暫時都係當上落市睇,移動區間維持27000至28000。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads