熱門:

2020年2月14日 即巿股評 港股直擊

【盤房來料】阿里巴巴有買貴 冇買錯

美股隔晚表現反覆,標指跟納指盤中創新高後回軟,三大指數下跌。不過國務院總理李克強要求有序恢復正常生產秩序,強調努力實現今年經濟社會發展目標任務,中港兩地股市做好。恒指今日跌噚日走勢相反,低開高走,一度升逾200點。

恒指低開31點,最多跌34點,低見27695點,仍然守喺250日線(27686)之上,其後隨內地股市掉頭向上,最多升230點,高見27960點。中午恒指報收27895點,升165點;國指則報收10900點,升64點。

重磅藍籌股個別發展,騰訊(00700)繼續係大市火車頭,半日升0.5%,創超過20個月新高,最高見過420元,到時之前阿Man提過嘅反彈目標415至420元,會唔會呢度呢個位就止步,暫時好難講,皆因走勢方面仍保持上升,只要整體市況維持強勢,騰訊更上一層樓亦有可能。

其他重磅股以陀地地產股反彈得唔錯,主要係市場憧憬政府減辣,不過阿Man對於減辣有保留,睇睇政府喺防控疫情慢半拍,搞到人心惶惶對政府信心盡失,呢個時候仲邊有時間去檢討樓市辣招。加上疫情對本港經濟影響有幾深遠,暫時亦屬未知數,唔少地主佬都願意減租,同租戶共渡時艱,肯定影響今明兩季租金收入,呢一下反彈只係超賣後技術反彈,咪以為咁就雨過天青。不過地產股亦佔指數一定比重,呢個板塊止跌回升,對大市向上挑戰二萬八關大有幫助。

科技股跟手設股今日只有騰訊一枝獨秀,其他股份普遍逆市下跌,而瑞聲(02018)跌逾3%,係半日表現最差藍籌。資金從科技及手設股流向醫藥股,整個板塊向上,而生物製藥股更得到多間大行睇高一線,阿Man之前睇好嘅藥明生物(02269),半日升1.7%,已連升11個交易日。講嚟講去醫藥股阿Man都係偏愛中生製藥(01177),之前股價喺11元樓下叫上車,最多跌穿10元打靶,上面先博重上12.5元,新高可期。

話咗物管股可以免疫於今次武漢肺炎疫情,甚至增值服務收入有機會增加,呢幾日整個板塊強勢依然,繼續有股份破頂創新高,多得多間物管公司陸續發盈喜。阿里巴巴(09988)公布第三季純利增長58%,不過預告肺炎疫情或對今季營收帶嚟負面衝擊,不過股價尚算硬淨,市場預期影響屬短暫,趁低吸納盤源不絕,阿里股價易升難跌,呢隻係阿Man認為今人年內有買貴,冇買錯靚股,值得耐心持有。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads