熱門:

2020年2月13日 即巿股評 港股直擊

【盤房來料】大市受制二萬八 騰訊一股當關

美股呢期確係完全免疫於武漢肺炎,隔晚美股三大指數又創新高,科技股尤其勇猛,帶動本來噚日已持續反彈的港股繼續高開,可惜港股喺二萬八點關口前阻力唔少,港股高開低走。恒指高開129點,見27953點已經係半日高位,開市即掉頭向下,最多跌120點,見半日低位27702點。恒指中午報收27784點,跌39點;國指報收10868點,跌16點。

騰訊(00700)仍然係大市火車頭,股價成功衝破南非頂及馬化頂之後,股價更上一層樓,股價半日升逾1%,半日報收415.4元,企得住415元,下一關當然係420元。不過睇埋其他重磅藍籌股,表現反覆,噚日有消息指或獲母公司注資嘅國壽(02628),今日澄清母公司未有計劃注入資產,暫時亦未有重大訊息要披露,半日回吐1.8%,股價仍然受制多條移動平均線,股價未能重上20元,走勢都係咁上下。至於其他重磅藍籌股都係跌多升少。石藥(01093)、蒙牛(02319)分別跌3%及2.6%。

雖然武漢肺炎疫情未見真正減退,但人民幣走勢尚算硬淨,對人民幣走勢較為敏感嘅內房股呢期同樣強硬。而中國全聯房地產商會,向內地政府提出15項政策建議,包括適度信貸支持,提供融資政策傾斜,內房股逆市向上。整個板塊平均都有超過1%升幅,其中寶龍地產(01238)發盈喜,預期較去年多賺逾四成,半日升5.5%。

除咗內房股或陸續報喜之外,物管股呢期亦頻傳喜訊,今早整個板塊逆市向上。繼雅生活服務(03319)發盈喜得到大行加持創新高後,今日到碧桂園服務(06098)發盈喜,股價創新高,其他中海物業(02669)、濱江服務(03316)、奧園健康(03662)跟新城服務(01755)亦齊齊創新高。

新經濟股仍然係阿Man最睇好嘅板塊,阿里巴巴(09988)再升0.5%,話咗210元樓下買錯唔得去邊。美團(03690)半日跌1%,睇好其中線前景,股價跌近96元可以放膽買。至於醫藥股今日受壓,同樣係可以趁回調買入龍頭股份。
暫時港股升到28000之前,即半日高位27953點,已經殺咗唔少熊證街貨,呢啲時候都抖抖,阿Man維持大市將進步上落市格局不變,二萬八點唔係咁易衝破,不過移動區間則上調至27000至28000點之間。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads