熱門:

2020年1月21日 即巿股評 港股直擊

【盤房來料】騰訊阿里二選一 阿里睇高一線

隔晚美股假期休市,但喺幾個負面消息夾擊下,港股半日重挫逾2%,穿頭破腳走勢之下,只恐怕港股將繼續向下尋找支持。恒指裂口低開346點,開市後跌幅一度收窄至303點見半日高位28492點,其後沽壓愈嚟愈大,接近中午一度急插680點,見過半日低位28115點。恒指中午報收28136點,跌659點;國指則報收11062點,跌268點。

以為大市喺20日線(28434點)會有啲支持,誰知裂口低開即叩此關,其後更顯著跌穿嫌失守,睇嚟大市好大機會先試二萬八點心理關口,再向下考驗250日線(27695點)。港股今日主要被三大負面因素夾擊,武漢爆發新型冠狀病毒肺炎,市內有15名醫護人員確診感染,即係話呢種病毒證實會人傳人,而疫情更擴散至多個省市,喺春運高峰期間,恐怕疫情進一步擴散,香港失守係遲早問題。除咗中國境內,東南亞其他國家,包括日本及南韓亦有發現個案,武漢肺炎實在不能睇少,尤其係經歷過2003年沙士之痛,若香港政府不好好把關,喺人口高度密集嘅香港,一旦疫情擴散都咪話唔大鑊,魚缸嚇到腳軟亦係人之常情。

除咗武漢肺炎疫情擴散之外,評級機構穆迪調低香港信貸評級,從「Aa2」下調至「Aa3」,評級下調主要係香港體制跟政府管治能力有問題,而穆迪亦指香港政府喺自治權方面制約比先前想像更大。其實穆迪調低咗香港信貸評級,最麻煩係會直接影響到借貸成本,所以內房股呢啲極度依賴借貸嘅板塊,今日跌到hihi。至於穆迪講到明係基於政府管治能力而調低評級,今次呢個政府都無得抵賴。可惜政府點樣辦事,大家有目共睹,一日政府領導班子仍然死性不改,香港都轉運都難。

上述兩個負面因素足以令港股作出較深度回吐,呢個時候重磅騰訊(00700)仲要加多腳,據SDI資料顯示,主席馬化騰喺上星期連續四個交易日,一共減持500萬股,每股作價398.1元至401.4元,套現20億元。缸邊友口痕話主席等錢過年,講笑咁講邊個要成20億過年,不得不佩服主席沽貨捕足倒近期高位,要沽咁大log貨都仲沽倒靚價,可以算得上係高手。記得2018年大股東南非主權基金以均價405元減持後,至今都未見番呢個位,整咗個叫南非頂出嚟,家陣主席400元左右減持,又多咗個主席頂,呢個頂加埋威力係白金級。其實喺走勢上,騰訊400至420係一個巨型蟹貨密集區,阻力唔嘢少,由320元延伸至400元升浪,嚟到呢個區域掉頭調整亦係預期之內,本身阿Man都係話呢轉400元目標好去到好盡。短線20日線387元支持今日失守,好可能要持續調整下試370元水平較強力支持,想撈貨真係唔使急。同埋唔少粉絲都問騰訊跟阿里(09988)兩者如何取捨,好老實阿Man認為阿里今年有買貴,冇買錯,贏面高過騰訊,識揀都係阿里睇高一線。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads