熱門:

2020年1月6日 即巿股評 港股直擊

【盤房來料】美團阿里今年染藍機會高

中美首階段貿易協議,如無意外可於本月中順利簽署,不過呢個消息炒咗成個幾月,乜都消化晒,而美股又接連創新高,都需要搵個藉口抖抖氣。而中東局勢轉趨緊張,剛好畀股市一個回調機會,上周五美股三大指數顯著回調,港股今日亦跟隨。

恒指低開125點,報28236點,跌幅曾收窄至83點,高見28367點,其後跌勢加劇,半日最多跌274點,見過半日低位28177點,但恒指喺10日線(28143點)有支持。其後喺A股回升帶動下,恒指跌幅再度收窄。中午恒指報收28261點,跌189點;國指則報收11219點,跌33點。

金融股拖低大市,友邦(01299)半日跌1.4%;大笨象(00005)亦跌0.9%,三大內銀則跌1%左右,合共拖低恒指100點。資金傾向避險,流入黃金及石油股,中海油(00883)半日升4.1%,為半日最佳表現藍籌股,中石油(00857)半日亦3.2%亦唔弱。其他油服股亦有資金流入,唯獨伊拉克業務較重嘅安東油田(03337)半日跌5.3%。至於金礦股以靈寶黃金(03330)半日近升12%至厲害,其他金礦股普遍升3%以上。留意金價升至1575元,升破之前1450至1550移動區間頂部,強勢盡現。

受地緣政治局勢緊張所影響,油價急升油股當然做好,但相反油價敏感嘅航空股則受壓,今日整個板塊均見腳軟,當中國泰(00293)跌2.6%算係跌得最少,南航(01055)跌幅達4.6%,油價高企,航空股咪話唔濕滯。

科網股個別發展,不過之前阿Man已提過睇好今年新經濟股表現,美團點評(03690)逆市創新高108.3元,半日升3.7%,報108.1元接近高位。美團係今年獲納入指數成份股熱門之選,加上北水掃貨積極,晉身紅底股後力保呢個身份,睇嚟又可展高新一輪升浪。至於騰訊(00700)升抵380元水平要抖抖氣,半日跌1%,報收379.2元,要重拾升勢向上挑戰400元的話,首要重上380元企穩。阿里巴巴(09988)則微跌0.2%,中午報收211.6元,阿里今年有買貴,冇買錯,同樣係今年晉身成份股熱門。之前建議大家喺回調時,喺190元至192元之間買入,目前已立於不敗之地,不妨繼續坐落去。

有消息指百度為來港第二上市作出內部評估,今年喺美國上市嘅中概股回歸港股係其中一個焦點,港交所(00388)食住呢條水,難怪大行相繼調高其投資評級及目標價,上周大摩將其目標價調高至310元,阿Man冇咁貪心,先向280元進發再上300元唔成問題。

至於上周熱炒嘅手設股回吐,瑞聲(02018)跟舜宇(02382)半日分別跌3.1%及2.7%,前者要睇65元失地能夠收復,後者則於130.8元,即50日線料有支持。不過5G概念股中興(00763)升破24元阻力後,愈升愈有,今日逆市再升近3%,中午報收26元,留意下一阻力喺28元。而晶片股中芯(00981)同樣逆市上升,暫時阻力14元,今日枝大陽燭幾靚仔。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads