熱門:

2020年1月3日 即巿股評 港股直擊

【盤房來料】中東局勢緊張 港股借機回吐

隔晚美股喺2020年首個交易日打響頭炮,升勢銳不可當,三大指數再創收市新高,納指更錄得自去年10月11日以嚟,最大單日升幅。除咗因為人行降準,環球央行普遍採取較寛鬆貨幣政策之外,美國公布新領失業救濟金人數連續第三個星期下跌,反映美國經濟有實質支持,美股升得有道理,自然走強。港股今早跟隨美股高開,可惜因為中東局勢緊張,高位見獲利盤湧現,港股先升後回。

恒指裂口高開284點,開市後一度升339點,見28883點,期指則曾高見28947點,一度逼近29000水平,但29000阻力難衝破,高位即見回吐壓力。盤中恒指一度倒跌98點,見28444點半日低位。恒指中午報收28495點,倒跌48點;國指則報收11291點,跌29點。

外電報道,美國對巴格達兩處跟伊朗有關嘅目標發動攻擊,因為之前有三枚火箭彈落在伊拉克首都巴格達國際機場附近,爆炸造成至少8人死亡。地綠政治風險升溫下,道指期貨一度挫逾200點,國際油價則急升逾4%,金價亦有避險資金湧入帶動,升至1539美元水平。金油升,股市會係硬道理,主要係資金流向問題,相關股份亦隨之異動,三桶油分別升2.6至3.3%不等,而油服股同樣見資金追捧。不過石油股難炒係公認事實,除非今年環球經濟好強勁,否則中東緊張局勢緩和,油價又會隨之回軟。石油股唯一賣點係現價估值仍便宜,就算呢啲位買入,大跌風險唔算高。

至於黃金股阿Man都係揀招金(01818),半日升4.6%,雖然升幅無山東黃金(01787)咁勁,但勝在流量較多,上落車容易啲。留意係黃金價格仍然未走出1450至1550呢個移動區間,現價再追入有幾多水位心中有數,除非升破1550元企穩,否則仍未離開區間移動形態。

科技股今日以比亞迪電子(00285)表現最突出,原因係有分析指集團有望打入蘋果產業鏈,半日升幅達13.8%。其他手設股則見回吐,而5G概念股都係望住隻中興(00763)。科技股阿Man今年睇實阿里巴巴(09988),除咗業務前景較騰訊(00700)好之外,有望晉身指數成份股,加上大部份大行畀嘅目標價講緊250元樓上,現價上車仍有唔少水位。
大市逼近二萬九阻力,難免有回吐,暫時喺28500點水平整固,只要能守住28500,仍有望再挑戰29000水平。至於未有貨想吼個靚位上車,若然回吐持續,或有望下試27800至28000點,見到回到呢啲位守住,可以放買貨。

麥狄文
(徐狄怡‧證監會持牌人

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads