其實市場嚟嚟去去都仲係炒緊兩大利好消息,包括中美達成首階段貿易協議,英國保守黨大選獲勝,歐美股市呢兩日都做好。港股噚日稍稍調整後,今日又發力,喺外圍股市做好下,港股高開,繼續做好並升至個半月高位。
恒指高開122點,開市升逾200點後,升幅曾收窄至55點,其後內地公布優於預期嘅經濟數據,A股做好,上證指數重上3000大關,帶動港股再擴大升幅,盤中最多升321點,見個半月高位27829點。恒指中午報收27815點,升307點;國指則升187點,報收10966點。
缸邊友笑言今日特首唔喺香港,無咗行政會議前見記者,少咗呢個人肉熊指標,個市先有得扶搖直上。大市向上又點少得騰訊(00700)呢隻指數權重股帶動,騰訊自從突破咗340元後,走勢轉好,今日半日更急升3.2%,報371.2元,大有條件向住380元下一阻力戰。
而其他科網股同樣有資金追捧,阿里巴巴(09988)創205.8元上市新高,半日報收205.4元,升2.2%。美團(03690)跟小米(01810)則分別升2.3%及1.1%。而手設股及5G股亦繼續有資金流入,不過升幅較之前溫和,開始喺高位整固。
醫藥股調整咗一輪,今日終見似樣反彈,主要係龍頭股中生製藥(01177)旗下抗腫瘤藥獲國家藥品監督管理局頒發藥品補充申請批件,股價半日飆4.8%,係表現最佳藍籌。其他醫藥股普遍亦錄得3%以上升幅。
而中美達成首階段協議,市場對明年全球經濟放緩憂慮減少,油價回升支持三桶油向上。不過油價仍然係大型長方型上落格局,三桶油升勢未必能持久,阿Man一向對三桶油有戒心,目前呢種睇法未有改變。
上周阿Man曾表示可留意內地券商股,原因係一旦澳門真係發展人民幣證券交易中心,都係中資券商最有優勢。而今日A股有表現,券商股即落鑊,大部內地券商股都錄得4%以上升幅,當中中信建投(06066)更升近6%。
相反澳門股今日見回吐,銀娛(00027)升得勁亦回得較多,半日跌近2%,藍籌當中包第尾,其他澳門股跌幅低於1.5%,相對日前升幅,回吐壓力唔算大,都只係正常回吐,有炒鬼臨近長假期食糊套利好正常。
不過中美達成首階段貿易協議呢個消息已炒足一個星期,喺假日氣氛逐漸濃厚下,短期港股再大幅向上動力未必夠。估計短線大市仍有望向27900至28000點,即11元高位挑戰,但要進一步向上再突破,似乎有啲難度。但只要大市守住250日線(27480點)上面,上升形態未變,咪多手做淡同大方向對著幹。
麥狄文
(徐狄怡‧證監會持牌人)