熱門:

2019年12月9日 即巿股評 港股直擊

【盤房來料】本地銀行獲大行調低評級及目標價

美股上周五做好,除咗因為中美貿易談判發展正面之外,當晚公布就業數據理想,帶動美股三大指數上升,而港股今日亦隨之連升兩日,今早一度收復10日及20日線,可惜中午收市,兩條移動平均線皆得而復失。恒指高開15點後,一度倒跌66點,見過26432點半日低位,喺26400點見支持,其後重上10日線(26522點)及一度上試20日線(26611點),見過半日高位26618點,最多升119點。其後升勢回順,升幅大大收窄,中午恒指報收26504點,升6點;國指則報收10413點,同樣升6點。

中美貿易談判似乎傾得幾好,即使侵侵已簽署香港法案,一度令中國不悅,又話要反制乜乜物物,但身體最誠實,拖咗超過一年嘅貿易戰,實在對中國經濟帶嚟打擊,把口再硬都唔可以死撐,始終都要盡快達成首階段協議,並繼續解決貿易戰,令中美雙方貿易關係正常化,最終目的梗係希望對方撤銷關稅。既然中美雙方目標一致,就係要盡快達成首階段協議,其他嘢都擺埋一邊先,以貿易談判為首要任務。既然首階段協議有望達成,人民幣匯價亦穩定落嚟,貿戰及人仔敏感股當然繼續有炒作。

一對手設股龍頭孖寶升勢持續,唔單止係貿戰現曙光,多間大行調高蘋果明年手機出貨量,相關設備股當然受惠。呢個板塊最近強勢,升得有板有眼,除非談判忽然反枱,暫時呢個板塊仍有缸邊友留戀。不過其他科網股則個別發展,除咗騰訊(00700)要撐住個市,仍然錄得升幅外,其他巨無霸科網股要抖抖。

人仔企穩內房股發力,加上有地方省市放鬆限購措施,內房股近日有追捧,唔少內房股已升抵年內高位,甚至有發力向上破頂之勢,破頂唔估頂,有貨不妨坐定定,但貿意已逼近阻力位嘅內房股,一見唔對路要識得落車。

雖然今早見瑞銀發表本地銀行評級報告,大部份本地銀行均被下調評級或目標價,但相關股份跌勢溫和,大笨象(00005)半日更升0.7%。香港整體經濟環境轉差,銀行內百業之母,肯定本地銀行亦難捱,咪見反彈手多追貨,否則買完又要侷坐。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads