熱門:

2019年11月27日 即巿股評 港股直擊

【盤房來料】阿里帶動科網股落鑊炒作

新高又新高,美股又再次創新高,主要係市場都相信,即使中美貿易談判首階段協議仍未定下簽署日期,但呢一日嚟到嘅時間不遠矣…...不過呢,落後美股一截嘅港股繼續跟唔上,而道指不經不覺,已較恒指高出千幾點,大家對道指高出恒指已習已為常,以前嘅所謂新常態變為常態,然後再變為理所當然嘅常理,到後來可能終有一日,大家漸漸唔記得咗,恒指曾經長期高過道指。

恒指高開29點,開市後曾倒跌47點,見過半日低位26866點,其後回升,最多升60點,見26974點,高低波幅一百點鬆啲,完全係靜過鬼。中午恒指報收26926點,升12點;國指中午報收10621點,微升4點。半日成交額412.9億元,扣除阿里巴巴(09988)半日達63.7億元成交額,其實半日成交額係少得可憐,睇嚟今日好難見番噚日過千億咁虛冚嘅場面。

阿里巴巴仍然矚目,阿Man喺阿里掛牌前,都講過阿里登陸之後,或取代騰訊(00700)呢隻長期最活躍股份,成為每日成交額榜首股。而阿里股價亦係資金流入支持下,今日再升3%,盤中曾見195元上市高位,半日報收193.4元。阿里作為中長線投資,吸引力大過騰訊,加上內地投資者對其業務熟悉,一旦稍後獲納入港股通,將吸引更多北水掃貨,又貨喺手唔甘於賺餐飯走人,正股可以坐定定。至於衍生工具都係嗰句,短線炒作可以,長坐其實係會蝕咗時間值,勤力些少走多幾轉亦無壞。

其他重磅股表現牛皮,大部份靠穩,但唔見有乜嘢特別,實在係乏善可陳。不過地鐵(00066)喺區議會選舉完畢後,逐步回復正常通車,只有個別車站仍然關閉,但大部份設施已修復並投入運作,而每日通車時間亦逐步延長,相信總會有回復正常一日。有見及此,高盛出咗報告叫買貨,刺激其股價半日升近3%。阿里掛牌股價報捷,帶挈其他科網股做好,另一重磅科網股美團(03690)半日升4%再創新高,其他科網股普遍向上。

至於醫藥股則個別發展,由於中生製藥(01177)首三季業績表現遜預期,股價半日跌逾4%,拖累其他醫藥股下跌,只有藥明一系逆行上升。今日再有股仔暴跌,被指跟建制派民建聯關係密切嘅首控集團(01269),開市即食瀉藥,最多跌78%後拉閘停牌,停牌前股價暴跌75%。而集團持有13.2%嘅成實外教育(01565),股價半日亦跌32%,創新低。

臨近年尾係唔少仆架行嘅年結大日子,喺孖展持續收緊下,已按倉嘅股仔喺未能填補孖展差額嘅情況下,被動式掟貨斬倉陸續有嚟,睇嚟上周兩隻單日暴跌九成嘅股仔嘅命運,唔排除繼續有股仔步其暴跌後塵。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads