人哋美股升到唔識停,直情要上太空咁嘅款,隔晚三大指數再齊齊創新高,中美貿易談判兩巨頭今早曾通電話,同意就首階段協議磋商嘅剩餘事項,保持溝通,談判進展理想,令本來隔晚已升緊嘅美股,今早道指期貨繼續升,帶動港股高開。美股表現強勁,但偏偏港股硬係跟唔上,雖然港股今早高開,但其後表現反覆。
恒指高開190點,甫開曾升234點,見27227點,係11月11日以嚟新高,其後沽壓漸增,其後由升轉跌,見26933點半日低位。中午恒指報收26948點,跌44點;國指則報收10623點,跌5點。
今日大市焦點唔使講,梗係超級巨無霸阿里巴巴(09988)首日掛牌,開市報187元,較招股價升6.3%,盤中曾高見189.5元,中午報收188.1元,高招股價6.9%,成交額高達98.16億元,為半場最活躍交投股份。預期喺阿里登陸之後,或長期雄霸成交額榜首位置,取代騰訊(00700)地位。有份認購阿里巴巴股份嘅缸邊友,都總算賺咗餐飯,仲係幾豐富嘅一餐。阿里登陸同時,相關衍生工具亦同步登場,而其中一隻行使價為195.88元嘅call 輪,成交額超過2500萬元,缸邊友相當捧場。
阿里嘅輪引伸波幅大概介乎36%至42%,投資者偏好揀輕微價外的條款,令呢類條款嘅窩輪嘅成交同埋街貨量較高。窩輪嘅引伸波幅去到三十幾四十巴仙,都仲有一定爆炸力,仍然有一定值博空間,只不過價外輪都係短炒啱啲,而價內輪有人話當正股咁持有,呢一點阿Man係唔認同,因為輪始終會輸時間值,記住衍生工具係買嚟炒,唔係買嚟坐嘅。
今日個恒指企唔穩二萬七,主要係幾隻重磅股都回吐,除咗大笨象(00005)半場靠穩外,友邦(01299)跟騰訊半場都要跌,後者始終上唔番340元,可見呢個位有一定阻力。而噚日亦提到陀地地產股反彈,唔好亂咁追貨,雖然過去嘅周末尚算平靜,但社會運動係咪就區議會選舉完成後即結束,仍有疑問,一旦社會仍處動盪,本港第四季經濟暫難翻生。
至於醫藥股都算係咁,雖然受帶量採購政策所影響,但經過早前回吐後,今早又回勇,始終資金對呢個板塊仍然留戀,都算係長炒長有。至於大市整體表現都係咁上下,睇嚟喺周四期指結算前,都喺二萬七左右上落,暫仍未見大戶喺轉倉方便有明顯部署。
麥狄文
(徐狄怡‧證監會持牌人)