熱門:

2019年11月22日 即巿股評 港股直擊

【盤房來料】港股唔死得 明靠北水撐

有關中美貿易談判嘅消息時好時壞,一陣又話中國唔肯加碼買農產品,又要美國先撤銷關稅先肯傾埋個首階段協議,而侵侵就睬你都傻,繼續強硬態度,表示中國唔簽首階段協議的話,再加碼中國進口商品關稅。呢啲負面消息令美股跌咗三日,幸而中國方便傳嚟中國副總理劉鶴,已邀請美國貿易代表萊蒂澤本月去北京面對面繼續磋商,不過美方尚未接受邀請。總之家陣中美貿易談判又再進入像霧又像花階段,而喺無其他焦點嘅情況下,市場仍會聚焦中美貿易談判,從而影響到美港股市表現。

美股都算係咁,雖然連跌三日,但跌幅唔算厲害,沽壓亦唔算強勁,主要係已完結嘅第三季度業績,超過八成標指成份股企業嘅業績都好過預期,呢個亦係支持美股高走嘅原因。可惜係港股無咁嘅本事,外憂內患下,大部份已公布嘅季度業績,極其量都係中規中矩,唔少都出現倒退或預計嚟緊業績瀨嘢居多,所以港股彈唔到亦有其道理。

講番今早恒指高開118點,曾升223點,見26690半日高位,可惜A股先升後跌,拖累恒指升幅收窄,50日線(約26651點)得而復失,盤中升幅曾縮到得番廿點咁大把,見過半日低位26487點。中午恒指報收26536點,升69點;國指中午報收10484點,升34點,彈力明顯比較弱。

不過港股弱還弱,暫時都仲叫頂得兩吓頭鎚,多得北人喺呢段時間積極掃貨,就算噚日跌咗四舊幾,但港股通仍然錄得30.12億元淨買入,而自11月初以嚟,累積淨買入已達216.48億元,呢隻都擺明係有形之手。阿Man只係擔心中美貿易談判屢現變數,雙方家下都仲係拖住先,咁個市都仲頂得下,至怕係雙方傾傾下又反枱,咁港股真心凍過水。若然首階段貿易協議簽署之前,再有乜嘢負面消息流出,大市下破26200點後,仍有機會下試25500至25800點,回到今次反彈浪起點,但當暫時仲喺26200至26800之間運行住先。相反,若然中美雙方唔再拖而搞到反枱收場,最低消費係25000點樓下嘅24800點,繼續惡化的話,下面乜位唔敢想像。

而各個板塊當中,又唔係全部死到直一直,人民早兩日試水溫咁下調咗LPR,可能為之後降準減息熱身,而內地增加減稅及降費措施,對基建投資,水泥、基建、內房股有利,仲有一直強勢嘅物管股同醫藥股,預期仍可以跑贏大市,唯一擔心係醫藥股面對政策風險較大。至於內銀股則不敢恭維,喺低息環境下,銀行息差收窄,利息收入減少令盈利下降,加上食埋咁多垃圾以股代債,資產質素亦持續變差,估計再平亦買唔落手。

而噚日因為不獲MSCI納入為MSCI中國全股票指數成分股嘅雅高(03313),噚日仆咗九成後停牌,今日復牌後跌對未止,一度再跌逾三成,雖然曾拗腰倒升,但半日仍要跌1.6%。講過呢啲單日高台跳水股,斬倉完通常無得救,然後就再無然後。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads