熱門:

2019年11月20日 即巿股評 港股直擊

【盤房來料】人行降LPR 內房內銀此起彼落

中未貿易談判又存變數,其實呢個亦係意料中事,但對美股未算有太大衝擊,美股隔晚收市個別發展,道指創新高後回吐,而納指仍能創收市新高。繼日前有消息指中方對首階段協議簽署並不樂觀,侵侵亦不甘示弱,隔晚即表示如未能跟中國簽署貿易協議,將會對中國進口商品加碼徵關稅。再加上美國國會參議院亦通過《香港人權與民主法案》,向已緩和嘅中美關係點火,隨時令中美貿易談判再陷困局。

喺咁嘅情況下,中港兩地股市回軟,恒指今早低開157點後,無幾耐已跌289點,見半日低位26804點,失守10日(26941)及20日(27007)線,其後喺100日線(26889點)喘定,跌幅曾收窄至142點,見半日高位26951點。恒指中午報收26924點,跌169點;國指則跌63點,報收10632點。

重磅股方面,騰訊(00700)曾跌1%後回順,始終要靠呢件巨無霸撐住指數,半日跌幅不足1%,但上面一日上破唔倒340元,記住都只係區間運行。另一隻指數重量級友邦(01299),半日跌1.7%,拖低恒指46點,其他重磅股普遍回軟,大笨象(00005)係少數上升嘅權重股。

瑞聲(02018)都算係咁,半日先跌後升,中午升至超過八個月高位,半日報收58.05元,升2.7%。而其他手設股個別發展,舜宇(02382)半日低1.5%,日前急升嘅丘鈦科技(01478)則靠穩,半日仍錄得0.5%升幅。

雖然手設股回吐,但今日到手遊股接力。Google推出的雲遊戲Stadia熱賣,市場憧憬將進入雲遊戲時代,手遊股有資金追捧,升得最勁係飛魚科技(01022),半日升一成,而IGG(00799)緊隨其後,半日升逾8%。不過手遊股炒作一向短癮,小心炒炒下樂極生悲。

內需股今日見沽壓,中國旺旺(00151)業績後跌3.6%,係半日表現最差藍籌,由於中美貿易協議又出岔子,不同板塊嘅內需股齊齊腳軟。醫藥股則個別發展,不過之前曾推介嘅微創醫療(00853),今日總算吐氣揚眉,半日回升5.2%。而藥明康德(02359)半日升2.3%,創100.8元上市以嚟新高,晉身紅底股……

人民幣下調LPR利率令內銀股普遍向下,幸而沽壓唔算大,四大行跌幅喺1%以內,相反降LPR對內房股有利,今日呢個板塊繼續逆市向上。內房股預期可以持續吸引資金,除非人民幣再忽然受壓。

麥狄文
(徐狄怡‧證監會持牌人)

 

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads