熱門:

2019年11月18日 即巿股評 港股直擊

【盤房來料】港股反覆暫時唔啱初哥入場

美股上周五三大指數齊創新高,投資者傾向相信中美將於短期內可達成首階段協議,而今早港股亦隨美股反彈。喺過去周末社會仍極之動盪嘅情況下,港股竟然完全漠視內部情況,只隨外圍走,顯然喺資金市之下,再加上無形之手進行維穩,港股半日仍升近300點,可以話跟社會現況完全背道而馳。

恒指高開115點,雖然開市無耐,升幅一度收窄至79點,見過半日低位26406點,但好友終守住26400點呢個好淡分水嶺,其後港股又再回勇,一度升361點,見過26688點半日高位,重上50日線(26654點)附近。恒指中午報收26618點,升292點;國指則升104點,升10529點。至於成交額方面,半日都係377億元,未見特別增加,唔稱得上有資金大量入場。

重磅藍籌股普遍上升,友邦(01299)跟騰訊(00700)兩巨無霸升逾2%,而吉利(00175)升3.1%,係半日最大升幅藍籌股。奇怪嘅係喺目前社會氛圍下,陀地地產股仍有得反彈,整個板塊升幅普遍升超過1%,而升得最多係太古地產(01972)。不過阿Man認為陀地地產股只係短暫反彈,喺經濟下滑之下,至怕係本地樓市開始趨向下行周期,咁陀地地產股有排頭痕,可能稍後只會有波幅,冇升幅。

所以阿Man上星期已講過,寧願睇番物管股好過,今日呢個板塊繼續精神爽利,多隻物管股齊創新高,包括阿Man喺呢度首隻推介嘅物管股中海物業(02669),半日升逾4%,所以話價值只會遲到,永不會缺席。其他物管股同樣做好,整個板塊繼續跑贏大市。

石藥(01093)今日公布第三季度業績,盈利半日升24%,只可惜股價不升反跌1.7%,連帶其他醫藥股今日都逆市下跌。不過阿Man對醫藥股前景仍充滿信心,觀察多一兩日,只要搵到支持位守得住,又係另一次撈貨好機會。

不過阿Man要提醒大家一句,中美貿易首階段協議,一日未簽紙落實,一日仲有變數,唔係坐定笠六,呢段時間港股隨時出現較大波動,咁嘅市況絕對唔係股票市場初哥,又或者未能完天候睇實個市嘅極度業餘炒家可以應付得嚟。自問道行唔夠高,呢期港股都係少沾手為妙,唔識跳者嘅,隨時車毁人亡。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads