中美貿易協議或要押後至12月初先正式簽署,不過市場對雙方達成首階段協議仍樂觀,不過美股之前博命創新高,而侵侵就係咁邀功,股市就借呢個消息回吐整固一下。加上美企業績公布得七七八八,又未有其他經濟數據出籠,美股抖抖亦好正常。港股升足五個交易日過千點,當然亦係時候抖抖,回吐整固。
恒指略為高開1點,其後升24點見半日高位27713點,其後掉頭向下,最多跌153點,見半日低位27534點,半日波幅有限,中午恒指報收27595點,跌92點;國指則跌25點,中午報收10835點。
前日阿爺已有公布限制打機,但騰訊(00700)早兩日都冇跌,今日先嚟半日跌近2%,其實個消息真係對騰訊唔係太大影響,手遊板塊亦有股上升,只係騰訊股價始終上唔番340元,連50日線330元都企唔穩,本身佢呢期係弱咗啲,要睇下星期嘅季度業績,能否助攻,帶領騰訊衝破阻力。留意騰訊呢兩樣如失守10日及20日線,即323及325元,走勢再次轉差,有貨喺手唔知捱唔捱到季績公布。
其他重磅藍籌股普遍下跌,而表現最差係瑞聲(02018)跟舜宇(02382),兩者分別跌3.5%及2%。其他重磅股跌幅普遍少於1%。但騰訊以及友邦(01299)兩股已拖低大市67點,即使其他重磅股唔係點跌,今日個市較為偏軟。
醫藥股一向係阿Man喜愛嘅板塊,石藥(01093)半日升3.2%,得到大行調升目標價,創52周新高,仲係表現最好嘅藍籌股。其他醫藥股亦有資金追捧,呢個板塊始終長炒長有。至於阿Man睇好內房股可隨人民幣回勇上升,今日不幸亦隨人仔回軟,人仔離岸價又去番七算水平,一個貿易協議延遲簽署消息令人仔腳軟,內股今早普遍回落。不過沽壓唔算重,尤其財務狀況較穩健嘅重磅內房股,跌幅有限。
以為W股炒到尾水,但美團(03690)又強到你唔信,半日再升近2%,盤中高見99元,向住紅底股目標出發。不過呢小米(01810)繼續唔爭氣,小米點解升唔起,阿Man都講過N次,長期低迷兼蟹貨多籮籮,莫講話要回復強勢,連10元都一直上唔番,基本上係失救。
大市呢兩日都係咁嘅款,唔上唔落作整固,不過市底已轉強,後市仍有條件衝上28000點,回報6月嘅上升裂口,想沽期指搵食唔容易,加上單日波幅咁窄,炒股唔炒市繼續。
麥狄文
(徐狄怡‧證監會持牌人)