熱門:

2019年10月30日 即巿股評 港股直擊

【盤房來料】汽車股業績強差人意

呢頭侵侵先一再強調中美貿易協議進度理想,嗰頭又有外電指中美雙方下月係唔會簽署首階段貿易協議,阿媽,我好亂呀……不過呢個外電就搞到中港兩地股市應聲而下,喺結算日嘅上半場,恒指一度跌逾百點。

恒指低開19點,雖然開市冇耐曾倒升22點,見過26809點半日高位,但其後又再回落,最多跌161點,見26625點半日低位。不過穿咗10日線(約26750)後又見買盤趁低吸納,令跌幅收窄。中午恒指報收26717點,跌69點;國指則跌39點,報收10507點。

咪以為個市有啲腳軟,騰訊(00700)一定跌,今日騰訊就先跌回升,不過一日股價唔上番320元樓上都係濕滯。至於大笨象(00005)股價續跌;友邦(01299)、平保(02318)都難逃一跌。藍籌之中以國壽(02628)表現最好,由於業績好過預期,半日升逾3%。

講咗N咁多次,阿Man對汽車股戒心大,炒作短癮,炒一日半日又無影,食少多教訓,寧願睇少一瓣。比亞迪(01211)第三季純利大幅倒退近九成,被大行削目標價唱淡,股價半日跌6%。廣汽(02238)第三季少賺52%,股價半日跌4.2%,而早兩日係威係勢嘅其他汽車股,全部難逃一跌。話咗呢個板塊業績難寄厚望,早前銷售數字有改善,都只係之前基數較低,業績一出又見真章,講到底呢個板塊都係避之則吉。

阿Man今年除咗睇好物管股跟醫藥股兩大板塊之外,內需股亦係其中一個不時有推介嘅板塊,記得年初時曾力推安踏(02020),喺公司被沽空機構狙擊之際仍未動搖,表示真金不怕洪爐火,股價被狙擊急挫係上車好機會,結果安踏亦不負所望,股價屢創新高,已遠超當時阿Man所訂下嘅目標價。今日安踏再因為向國際奧委會供官方服裝,股價半日再升3.2%,當然又係創新高。而另一體品股李寧(02331)走勢同樣維持靚仔樣,不妨望多兩眼。

至於阿Man上周曾推介嘅冷門5G概念股艾伯科技(02708),已順利升抵3元目標價,呢個星期開始進行整固,若然上次錯過咗,不妨吼股價整固回調搵個位上番車,暫時其股價喺2.7至2.8應該有唔錯支持,要翻兜或者上車,不妨吼住2.8元附近,若然跌穿2.6元就止蝕唔使諗,估計搞得5G咁大壇嘢,無理由炒兩日玩完咁短癮。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads