熱門:

2019年10月23日 即巿股評 港股直擊

【輪證贏家】準備滙豐Put

呢兩日大市實在太悶啦,今朝喺巴士上見到恒指做完U盤,只係低開14點,報26771點;返到公司時大約9點40至45分到,見到恒指點數都係變化不大,於是就搞住其他嘢先,諗住過多陣睇吓咩環境。誰不知依家10點5分,已經見到恒指跌191點,做緊26594點,似乎有咗一個明確嘅方向出嚟,唔通我又遲咗?忽然諗起噚晚同我家老爺喺屋企睇《全民造星2》時,其中一位導師火火幾次都係想聽參賽者唱兩句歌先再作決定,但就往往被Miss Chan Chan「截餬」;大家都係一樣,想比少少時間先再做決定啫。

不過,股市又無乜話先至先得嘅,有時甚至可以遲嚟先上岸添,依家10點9分,恒指跌幅略擴大至217點,做緊26568點,日線圖上見今日恒指明顯下行,暫時低位做過26558點,都仲叫做有條10天線(26536點)支持住;而上方條100天線(27024點)同保歷加道通頂部(27002點)愈嚟愈近,反映呢兩條線嘅水平所形成嘅阻力唔細;要升穿都真係唔係一時三刻嘅事。

望望恒指牛熊證街貨圖,以現價計恒指更係靠近下方牛證啦,而下方牛證最貼價就係26500至26599點,呢度有相當於289張期指,如果再落多一層,即26400至26499點呢度,就有相當於461張期指;至於上方熊證最貼價仍然係26800至26899點,呢度只有相當於59張期指,再上多一層,即26900至26999點嘅話,都只係得139張期指。27000至270999點先至開始見到多啲貨,講緊有732張期指,不過呢個阻力位,恒指靠咩消息嚟衝上去呢?唔通就係靠今朝早見到《Financial Times》嗰條講北考慮出年3月林鄭下台單新聞成真?真係咁嘅話,小鳳姐會好唔得閒。

再睇返噚日喺[下半part]時望過吓嘅滙控(00005),依家做緊$61.25,跌0.24%,日線圖上見滙控今日粒燭攔腰掛咗喺條100天線($61.351)度,而SlowSTC(14,3)仍然處於嚴重超買水平,不過%K線仍未跌穿%D線,但超買到咁真係同掉頭不遠而,諗人主揀定隻滙豐熊,但條款同表現都確實係麻麻地,轉睇Put,終於都搵到隻好少少,就係滙豐Put(29344),行使價$58.83,約4%價外,高槓桿、低引伸,今年年底到期,不過見滙控依家5分鐘圖落到嚴重超賣水平,想Put佢除咗等返分鐘圖個位上返去之外,記得等埋日線圖上嘅SlowSTC(14,3),條%K線高位跌穿條%D線先至係重點呀!

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads