熱門:

2019年10月16日 即巿股評 港股直擊

【輪證贏家】俾啲耐性等市回

呢兩日個市太悶啦,坦白講都真係無乜心機,為免重蹈前日見到恒指5分鐘圖SlowSTC(14,3)上到中軸水平,駁等上超買走貨但失敗,仲差啲甩唔到手嘅覆轍,見恒指牛(57414)做到接近/高過平均買入價少少,於是就選擇收手。以恒指5分鐘圖嘅SlowSTC(14,3)喺噚日朝早10點55分至11點5分時見中軸位,同步(57414)高低位見過$0.07/$0.067,平均賣出價就係$0.0685,賬面打個和,齋輸手續費。

悶市從來都係對炒輪不利,因為如果見到之前大市上行而買入Call嘅話,即使之後個市只係跌得嗰幾十點,但由於波幅減少嘅關係,有機會從而影響到引伸波幅下降,咁就會影響到輪價;至於牛熊證方面,由於證價受波幅影響唔太多,所以可以話係無乜影響,只係純粹揸住隻證會覺得悶啫。其實呢啲市最好就係玩界內證,但可惜界內證喺市場上都仲算係新product,唔知有幾多人認識,亦唔知識嘅人當中有幾個願意玩,噚日開個界內證search engine出嚟,幾乎全數無成交,就知道界內證7月到依家都仲係好冷清啦。

依家9點58分,新聞組同事未返齊人,不過距離林鄭發表《施政報告》仲有一個鐘頭到,應該都仲趕得切嘅。至於恒指,今朝開市升50點,報26553點;至依家見升幅擴大,至133點,做緊26637點。

日線圖上見恒指仍處於保歷加上升通道裡面,而保歷加通道口就繼續收窄中,暗示大市就算再有力上/下行,但可行嘅空間已經有限。同步下方SlowSTC(14,3)%K線同%D線已經踩入超買至嚴重超買水平,就算今日見條恒指波幅指數(VHSI)回升,但暫時都係呈高開低收,悶局情況暫時不變。

再睇埋恒指牛熊證街貨圖,牛熊兩邊今日都無新增街貨層,而熊證最貼價嘅係26600至26699點,呢度有相當於217張期指,數土雖然唔算多,但以依家10點6分,恒指最高暫時做過26653點計,已經殺咗呢層裡面部份街貨。將呢層熊證街貨拆做以50點為一層去睇(坊間有輪商係有提供以50點為一層街貨嘅數架),26600至26649點呢度其實就只有21張期指,而26650至26699點呢度先至有196張期指,咁即係話大市就算波幅唔高,但如要果要上去食埋呢百零張期指街貨嘅話,對佢嚟講難度都唔算好大;只係問題在於係唔係要趕住今日殺埋啫。

至於牛證最貼價就係26100至26199點,只有相當於161張期指,以現價(10點10分mark底26639點)計,要大市落返去呢層牛證嘅門口位(即26199點),講緊要掉頭下行440點。唔係話個市唔會跌,只係現階段大市似乎未有啲咩理由咁向下行。恒指牛(57457),收回價25998點,同現價有逾600點差距,係貼價堆牛證當中,敏感度高、街貨少、成交活躍,依家10點20分,見恒指升幅慢慢收窄,應該5分鐘圖SlowSTC(14,3)由超買準備回落到超賣水平啦,見超賣時就可以小注入市,所以依家俾多少少耐性啦。

今日下晝小妹要去牙醫度覆診呀,所以【輪證下半Part】要暫停一日,聽日見。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads