中美貿易談判消息飄忽,一時又話協議好大機會達成,美股周初連升兩日,誰知今早瞓醒,又話啲部長級唔多啱傾,雙方談判無乜進展,國務院副總理劉鶴將提早返歸,搞到今朝道指期貨曾經狂插超過300點,而恒指喺新加坡黑期亦一度跌至25400水平。恒指低開57黠,一度跌160點,見過自9月3日以嚟低位。
不過外電有報道指美國正研究以早前同中國所達成嘅滙率協議,作為中美貿易談判初步協議其中一部分。而喺美國將唔少中資企業放入黑名單之際,卻有傳聞指同時允許部分企業向華為供貨,令港股止跌回升。恒指曾回升116點,見過25799點,只係市底偏弱下,上升力量有限,其後升幅少咁截。中午恒指報收25729點,升46點;國指中午報收10209點,升40點。
重磅藍籌股都係咁上下,個別發展不值一提,話咗炒股唔炒市,都係逐個板塊搵好股實際。有傳聞指蘋果公司最快會喺明年第三季首推5G手機,而同時《紐約時報》報道,侵侵計劃准許美國個別公司,向華為供應非敏感性產品,消息刺激手機及5G概念股造好。雖然相關股份今日普遍有不俗升幅,不過阿Man就信唔過侵侵,出咗名五時花六時變,手機股一向係貿易戰敏感股,股價走勢隨住消息兩邊擺,任何轉身再快亦未必跟得貼,對於相關股份,都係食吓花生算數。
反而內需股呢排續有資金追捧,日清食品(01475)雖然估值已偏高,但仍有大行睇好,目標價調高至7.5元,半日股價升逾2%,一步步向目標出發。而乳品股龍頭蒙牛(02319)同樣係生活必需品,股價早前見過29元樓下又開始重拾升浪,留意去到32元左右有阻力,撈咗平貨隨時留意落實食糊。
美團(03690)呢期當紅又當炒,已經連升六日,主要係大行相繼品好並調高其目標價,今日股價又見新高兼向住紅底股出發,冇咗個天花板頂住,走勢暫時仍向好,不過花無百日紅,小心隨時見回吐。反而阿Man留意到平安好醫生(01833)呢兩日走勢突破,早前有大行報告將其目標價調高至60元,今日半日一度高見55.4元,其後升勢回順。由於集團註冊用戶已增至3億個,2019年6月月活躍用戶數和月付費用戶數分別達6270萬人和220萬人,同比分別增長29%和61.2%。龐大用戶群有望成為未來集團收入持續高速增長的爆破點。股價有望重遊上市舊地,呢轉先以55元為首個目標,企得穩呢個水平,再向前高位58.7元至60元出發,又係另一隻有機會打破天花無極限嘅潛力股,值得留意。
麥狄文
(徐狄怡‧證監會持牌人)