熱門:

2019年10月9日 即巿股評 港股直擊

【盤房來料】港股險守支持危危乎

中美新一輪貿易談判將於明日展開,但美國商務部喺周一先宣布將28間中國科技公司及公安部門,列入美國出口管制黑名單;隔晚又宣布因為新疆維吾爾族及其他回教少數民族問題,對相關嘅中國官員實施簽證禁令,連官員家屬嘅赴美旅行也將受到限制。咁你美國擺咗個咁嘅姿態,中國亦唔會同你客氣,傳聞將縮短行程。本來上兩個星期市場對於今次中美貿易談判充斥住樂觀情緒,更有缸邊友以為今次係一個終結,貿易戰可以告一段落。阿Man呢就一向審慎兼保守,基於兩國喺四大原則好難達成協議之下,其實搞多N咁都次談判都未必講得掂數。

中美雙方嘅四大矛盾包括,一,貿易逆差問題,呢個係死症,無得搞;二,知識產權問題,呢個要問中國,又係無得搞;三,政策傾斜同補貼問題,兩邊都有各自補貼不同產業,有理說不清;最後係滙率操縱問題,係涉及雙方徵收關稅,一個雞先定蛋先嘅問題,即係又無得搞。咁呢四大矛盾一日解決唔倒,究竟可以點傾落去,阿Man就當然唔識拆局。

受貿易談判再添陰霾拖累,美股隔晚顯著下跌,恒指今日低開156點,一度跌211點見25682點半日低位。不過阿Man都講過25600點呢一個重要支持不容有失,其後恒指跌幅曾收窄至26點,見過25866點半日高位;國指更倒升,可惜最終又打回原形,回復跌勢。中午恒指報收25716點,跌176點;國指則跌10189點,跌12點。

大摩唱衰本地銀行,將香港銀行評級降至謹慎,仲叫減持大笨象(00005)及恒生(00011),並調低多間本地銀行股目標價,呢個板塊無一倖免,全部插水。當中東亞(00023)跌3.5%跑第尾,恒生唔好得幾多,半日都要跌3.4%。
之前市場對貿易談判有所憧憬,手機設備股落鑊,阿Man有提醒過大家要知進退,皆因呢個板塊對貿易戰消息敏感,隨時一啖砂糖,一啖屎。今日整個板塊均告下跌。當中比亞迪電子(00285)跌半成較為慘情。

每次貿易戰有乜冬瓜豆腐,金礦股就落鑊,金價上升反映資金再度避險,金價重上1500美元,銀行亦上升,阿Man始終鍾情SPDR黃金ETF(02840),不過相對金價呢隻ETF真係跟唔足,諗諗下去銀行直接買paper gold可能更着數。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads